Abaı oblysynyń ákimi Úkimet otyrysynda órtke qatysty jaǵdaıdy baıandady

ASTANA. QazAqparat – Semeı ormany órtin sóndirý 2 baǵytta júrgizilip jatyr. Bul týraly Úkimet otyrysynda Abaı oblysynyń ákimi Nurlan Uranhaev aıtty, dep habarlaıdy QazAqparat tilshisi.

«Búgingi tańda órttiń jalpy aýdany shamamen 60 myń gektardy qurady. Onyń 43 myń gektary belsendi termonúkteler, eldi mekenderge qaýpi joq. Qazirgi tańda órt sóndirý jumystary eki baǵytta jalǵasýda. Batysta órt toqtatý úshin 300-den astam jeke quram, 30-dan astam birlik tehnıka, ekinshi baǵytta 200-den astam jeke quram jáne 40-tan astam tehnıka jumys jasap jatyr.

Jalpy órtti joıýǵa 1 532, 321 birlik tehnıka jáne 14 tikushaq jumyldyryldy», - dedi ákim.

Oblys basshysynyń aıtýynsha, tehnıkany otynmen qamtamasyz etý úshin ákimdik 20 tonna janar-jaǵarmaı jiberdi. Taǵy 50 tonna otyn jiberýge múmkindik bar, daıyn tur. Sonymen qatar birneshe eldi mekenniń turǵyndary qaýipsiz jerge kóshirildi.

«Kóshirý oryndarynda polıtsııa qyzmetkerleriniń kezekshiligi uıymdastyryldy. Turǵyndar Semeı qalasy men Borodýlıha aýylynyń evakýatsııalyq pýnkterine ornalastyryldy. Órt sóndirýge jumyldyrylǵan jáne evakýatsııalanǵan azamattar úshin azyq-túlik jetkilikti», - dedi Nurlan Uranhaev.