Abaı oblysynyń ákimi Semeı turǵyndarymen kezdesti
Nurlan Uranhaev jergilikti jurtshylyqpen alǵashqy kezdesýin Melkombınat kóshesi 3, 4, 10, 11 mekenjaıyndaǵy úılerdiń turǵyndarymen bastady. Azamattar óz sózderinde jylytý máselesiniń sheshimin tezirek tapqanyn qalaıtyndyqtaryn jetkizdi.
«Biz ortalyq jylytý júıesine qosylmaǵanbyz. Osy másele kópti tolǵandyryp otyr. Buryn bizde jylý men ystyq sý bolǵan. Un-jem kombınaty ketken soń, eshkimge kerek emes bolyp qaldyq. Peshti ózimiz jaǵamyz. Aramyzda qarttyq kelip, júrip-turýy qıyndaǵandar az emes. Oǵan qosa otyn tasyp, ekinshi qabatqa kóterýimiz kerek. Úılerdiń ózi aǵashtan jasalǵan, kez kelgen ýaqytta órt bolýy múmkin. Jaqynda ǵana-aq úılerdiń birinde órt shyqqan edi», - dedi turǵyndar.
Abaı oblysynyń ákimi bul baǵytta jumystar júrgizilip jatqanyn aıtty.
«Qazir smetalyq qujattama daıyn. Jaǵdaı jaqsarady degen senimdemin. Bir mezette bári sheshile qoımaıdy. Barlyǵy birtindep oryndalady. Biz jumysty osy jyly bastaýǵa jáne aıaqtaýǵa tyrysamyz. Eń bastysy, jylytý máselesin sheshý kerek», - dedi Nurlan Uranhaev.
Oblys basshysy jaýapty organdarǵa jumystardyń oryndalýyn baqylaýǵa alýdy tapsyrdy.