Abaı oblysynyń ákimi Besqaraǵaı aýdanynyń turǵyndarymen kezdesti

SEMEI. QazAqparat – Oblys ákimi Nurlan Uranhaev Besqaraǵaı aýdanyndaǵy esep berý kezdesýinde óńir turǵyndaryna bıylǵy jarty jyldyqta óńirdiń áleýmettik-ekonomıkalyq damýyn baıandap, aǵymdaǵy jyly qandaı jumystar josparlanǵanyn atap ótti, dep habarlaıdy QazAqparat.

Bıylǵy jartyjyldyqta joǵary kórsetkishterge qol jetkizgen oblysta Besqaraǵaı aýdanynyń úlesi de bar. Aýdanda taý-ken ónerkásibi salasynda «GRK Elektrým», «Semeı Orda», «Qaznıkel, óńdeý ónerkásibinde «Lesresýrs» jaýapkershiligi shekteýli seriktestikteri jumys jasaıdy.

«Agroónerkásip kesheni bıylǵy alty aıda 22,2 paıyzǵa ósti. Osy kezeń ishinde ónerkásipte óndirilgen 670 mlrd. teńgeden astam ónim kóleminiń 870,7 mln. teńgesi Besqaraǵaı aýdanyna tıesili. Sonymen qatar oblysqa tartylǵan 230 mlrd. teńge shamasyndaǵy ınvestıtsııa kóleminiń 2,6 mlrd. teńgesi de aýdannyń úlesinde. Qazirgi kórsetkish boıynsha ınvestıtsııa tartýdan oblystaǵy ósim 154,2 % qurap otyr», - dedi oblys basshysy.

Aýdannyń jaǵajaı jáne emdik-saýyqtyrý týrızmin damytýdaǵy áleýeti zor. Shıpaly Shoshqaly kólinen basqa, «Svıatoı klıých» orny, «Elimaı» demalys bazasy, «Jas qanat», «Radýga» balalardy saýyqtyrý lagerleri ornalasqan. Sondyqtan bul jerde týrızm jáne saýyqtyrý baǵytynda júıeli jumystar qajet.

«Birinshi jarty jyldyqta oblys turǵyndary 130 myń sharshy metrden astam turǵyn úıge qonystandy. Besqaraǵaı turǵyndarynyń ıgiligine 2 myńnan astam sharshy metr turǵyn úı berildi. «Aýyldyq densaýlyq saqtaýdy jańǵyrtý» pılottyq jobasy sheńberinde 65 medıtsınalyq nysan salý josparlanǵan. Aýdandyq aýrýhanaǵa medıtsınalyq tehnıkany satyp alýǵa 45,4 mln. teńge qarastyrylyp otyr. «Aýyl – el besigi» jobasy aıasynda 511 mln. teńgege 4 mádenıet mekemesin qaıta jańartyp, jóndeý jumystaryn júrgizý josparlanǵan. Sondaı-aq aýdandyq mádenıet úıiniń ǵımaratyn aǵymdaǵy jóndeýge oblystyq bıýdjetten 55,7 mln. teńge bólindi», -dep atap ótti Nurlan Uranhaev.

Oblysta oqýshy orynynyń tapshylyǵy máselesi bar. Oryn tapshylyǵyn «Jaıly mektep» ulttyq jobasy aıasynda 5700 oryndyq 11 mektep salý jáne 2100 oryndyq 6 mektepke qosymsha qurylys júrgizý arqyly sheshý josparlanǵan.
Byltyr 1700 orynǵa arnalǵan 4 mektep paıdalanýǵa berilgen. Onyń qatarynda Besqaraǵaı aýdanynyń Jylandy aýylyndaǵy mektep te bar.

Aýdandaǵy keıbir bilim berý mekemelerin salý, jóndeý jumystaryn júrgizý, modıfıkatsııalanǵan kabınetterdi satyp alýǵa baǵyttalǵan sharalar oblysty damytýdyń 2026 jylǵa deıingi keshendi josparyna engizilgen.
Kezdesýden keıin oblys basshysy Besqaraı aýdanynyń turǵyndarymen jeke qabyldaý ótkizip, suraqtaryna jaýap berdi.