Abaı oblysyndaǵy órtten kelgen shyǵyn áli eseptelgen joq – Qarjy mınıstri

ASTANA. QazAqparat - Abaı oblysyndaǵy órtten bolǵan shyǵynǵa qatysty esepteýler júrgizilgen joq. Bul týraly Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Jalpy, órt saldaryn óteý boıynsha shyǵyndar áli eseptelgen joq, óıtkeni órt áli de tolyq sóndirilmegen. Bul úshin Úkimettiń de, Abaı oblysynyń de rezervi bar. Naqty esepteýler júrgizilgennen keıin, málimetterdi jarııalaımyz. Bul turǵyda qajet bolǵan jaǵdaıda, tıisti tólemderdi jasaımyz», — dedi Erulan Jamaýbaev Senat otyrysynan keıin jýrnalısterdiń saýaldaryna jaýap bere otyryp.

Búgin sondaı-aq Tótenshe jaǵdaılar birinshi vıtse-mınıstri Ibragım Kúlshimbaev órtti óshirýge arnalǵan áýe tehnıkasy jaıynda túsinik bergen edi.

Onyń paıymynsha, aldaǵy 4-5 kúnde órt tolyqtaı sóndirilýi múmkin.