Abaı oblysyndaǵy órtke baılanysty qansha aýyl turǵyny evakýatsııalandy

SEMEI. QazAqparat – «Semeı-ormany» memlekettik tabıǵı rezervaty aýmaǵyndaǵy órtke baılanysty osy ýaqytqa deıin 3 aýyldyń turǵyndary evakýatsııalandy, dep habarlaıdy QazAqparat.

Búgingi tańda Semeı qalasynyń úsh evakýatsııalyq pýnktinde Talıtsa, Polovınkı, Bulaq aýylynyń turǵyndary – 150-ge jýyq adam, ornalasqan», - delingen Abaı oblysy ákimdiginiń málimetinde.

Qalada barlyǵy 9 evakýatsııalyq pýnkt jabdyqtalǵan, olar qajet bolǵan jaǵdaıda 800-ge jýyq adamdy qabyldaýǵa daıyn.

Qaýipsiz jerge kóshirilgen turǵyndar azyq-túlikpen jáne birinshi kezekte qajetti zattarmen qamtamasyz etilgen. Sonymen qatar tabıǵı apat aımaǵynda qalǵan adamdar órt bolǵan jerde ákimdik volonterlermen birlesip turǵyndarǵa jan-jaqty kómek pen qoldaý kórsetip jatqanyn aıtýda.

«Keshe qatty tútin shyǵyp, ákimdik tótenshe jaǵdaılar qyzmetkerlerimen birge bizdi evakýatsııalady. Evakýatsııa jaqsy ótti, bizdi avtobýspen Semeı qalasyna jetkizdi. Munda órt aıaqtalǵansha kútý úshin qajet nárseniń bári bar», - deıdi Bulaq aýylynyń turǵyny Jıengúl Qurmashova.

Eske salaıyq, «Semeı» ormany rezervatynda órt 8 maýsym kúni shyqqan bolatyn.
Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Tilsiz jaýdy aýyzdyqtaýǵa jumyldyrylǵan 14 ormanshy qaza boldy. Barlyǵy memlekettik nagradaǵa usynyldy.

Semeı ormanyndaǵy órt faktisi boıynsha qylmystyq is qozǵaldy.

Birneshe aýyl turǵyndary qaýipsiz jerge evakýatsııalandy.

10 maýsymda túste jalyn sharpyǵan aýmaq 60 myń gektardan asyp ketkeni habarlandy.

Keshe Prezıdent Qasym-Jomart Toqaev jumys saparymen Abaı oblysyna bardy.

Sapar barysynda Memleket basshysy orman alqaptaryndaǵy órt sóndirý jumystarymen tanysyp, shuǵyl áreket etý shtabynyń otyrysyn ótkizdi jáne órt kezinde qaza tapqan orman sharýashylyǵy qyzmetkerleriniń týystarymen kezdesti.

12 maýsym Semeı ormanyndaǵy alapat órtten qaza bolǵandardy aza tutý kúni bolyp jarııalandy.