Abaı oblysyndaǵy órt saldarynan qaza tapqan 14 adamnyń otbasyna páter kilti tabystaldy

ASTANA. QazAqparat - Memleket basshysynyń tapsyrmasy boıynsha Abaı oblysynda orman órtteri saldarynan qaza tapqandardyń otbasylaryna jan-jaqty qoldaý kórsetiledi, dep habarlaıdy QazAqparat Abaı oblysynyń ákimdigine silteme jasap.

Ár otbasy 7 mln teńge, sondaı-aq, qosymsha ár balaǵa 2 mln teńge tólenedi. Kómekke asyraýshysynan aırylý boıynsha járdemaqy, birjolǵy áleýmettik tólem, sondaı-aq jaılastyrylǵan turǵyn úı berý kiredi. Sonymen qatar, qaıtys bolǵandar men olardyń otbasylarynyń nesıe júktemesine yqtımal esepten shyǵarý úshin taldaý jasalady.

Búgin órt saldarynan qaza tapqan 14 adamnyń otbasyna, sondaı-aq traktorshy S. N. Arhıpovtyń otbasyna Semeı qalasy Qaraǵaıly shaǵynaýdanyndaǵy jańa páterlerdiń kiltteri tabystaldy. Abaı oblysynyń ákimi qaıtys bolǵan Saıat Nurjigitov pen Amangeldi Dúısembaevtyń otbasylaryna 2 jáne 3 bólmeli páterlerdiń kiltterin tapsyrdy.

«Órtten zardap shekkenderdiń otbasylaryn qoldaý boıynsha júrgizilip jatqan jumystar bizdiń turaqty baqylaýymyzda. Búgin biz tapsyratyn jańa páterler barlyq qajetti jıhazdarmen jáne turmystyq tehnıkamen tolyq jabdyqtalǵan. Biz qosymsha kómek kórsetýdi jalǵastyramyz», - dep atap ótti Uranhaev.

Qaza tapqandardyń týystary memleket tarapynan kórsetilgen kómek pen qoldaý úshin rızashylyqtaryn bildirdi.