Abaı oblysyndaǵy órt: qatty tútin ushqyshtardyń jumysyn qıyndatyp jatyr

ASTANA. QazAqparat – Abaı oblysynda orman órtimen kúres jumystary jalǵasyp jatyr dep habarlaıdy QazAqparat.

Qazir órttiń jalpy aýmaǵy shamamen – 60 myń ga. Alaıda eldi mekenderge qaýip joq. Ekologııa jáne tabıǵı resýrstar mınıstrligi órttiń taralýyn shekteý úshin tıisti sharalar júrgizilip jatqanyn málimdedi.

«13 maýsym kúni tańǵy saǵat 4-ten bastap órttiń shetterin sóndirý maqsatynda tórt áýe bortynyń ushýy júzege asyryldy. Alaıda qatty tútin ushqyshtardyń jumysyn qıyndatýda. Qazirgi ýaqytta órtti sóndirýge barlyǵy 1803 adam, 348 birlik túrli tehnıka men 12 tikushaq jumyldyrylǵan», – dep jazylǵan mınıstrlik habarlamasynda.

Meteorologtardyń habarlaýynsha, 13 maýsym kúni keshke ótkinshi jańbyr jaýyp, naızaǵaı oınaýy múmkin. Kúndiz soltústik-shyǵystan jel soǵýy yqtımal.

Aıta keteıik, buǵan deıin Abaı oblysynyń ákimi Nurlan Uranhaev jalynnyń áli de basyla qoımaǵanyn, dese de orman órtinen jaqyn aýmaqtaǵy aýyldarǵa qaýip joq ekenin aıtqan bolatyn.

Eske salaıyq, 8 maýsym kúni tutanǵan «Semeı» ormany rezervatyndaǵy órtpen kúreske jumyldyrylǵan 14 ormanshy qaza bolǵan edi. Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Prezıdent Qasym-Jomart Toqaev jumys saparymen Abaı oblysyna bardy.

12 maýsym elimizde Aza tutý kúni bolyp jarııalandy.