Abaı oblysyndaǵy orman aýmaǵynan shyqqan órt 20 gektar aýmaqty sharpydy
22:30, 21 Maýsym 2022
SEMEI. QazAqparat – Abaı oblysyndaǵy orman aýmaǵynda shyqqan órt 20 gektarǵa jaıyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt 21 maýsymda saǵat 18:45-te Besqaraǵaı aýdany Jetijar aýylynan 30 shaqyrymdaı jerde shyqqan.
«Semeı ormany» memlekettik orman tabıǵı rezervaty Dolon fılıalynyń aýmaǵynda órt boldy. Shamamen 20 gektar aýmaqta shóp pen aǵash órtenýde. Eldi mekenderge qaýip tónip turǵan joq», - delingen aqparatta.
Qazirgi ýaqytta tilsiz jaýmen departamenttiń 11 qyzmetkeri, 30 ormanshy men 14 tehnıka kúresýde. Sondaı-aq Semeı qalasynan 18 adam men 4 órt sóndirý kóligi kómekke kele jatyr.