Abaı oblysyndaǵy evakýatsııalyq pýnkterge ornalasqan turǵyndardyń jaǵdaılary qandaı

SEMEI. QazAqparat – Abaı oblysynda órt saldarynan úılerinen ketip, evakýatsııalyq pýnkterge ornalastyrylǵan turǵyndar qazirgi jaǵdaılary týraly aıtyp berdi, dep habarlaıdy QazAqparat tilshisi.

Abaı oblysynda alapat órt saldarynan Borodýlıha aýdanyndaǵy Talıtsa, Polovınkı jáne Bulaq aýyldarynyń turǵyndary evakýatsııalanyp, Semeı qalasyndaǵy kolledj jataqhanalaryna ýaqytsha ornalastyrylǵan.

«Bizdi eki ret evakýatsııalady. Aldymen 9 maýsymda qatty tútinniń kesirinen aýyldan shyǵaryp, pedagogıkalyq kolledjiniń jataqhanasyna jetkizdi. Kelesi kúni tańerteń úıge qaıttyq. Biraq bir saǵat ótken joq, órtten shyqqan tútin aýyldy qaıtadan jaýyp tastady. Túnde qarańǵy boldy. Taǵy da evakýatsııa jarııalandy. Polıtseıler úılerdi aralap, eshkim qalmas úshin árqaısymyzǵa eskertý jasady. Endi bizdi elektrotehnıkalyq kolledjdiń jataqhanasyna ornalastyrdy. Ár otbasyna bólme tańdaý usynyldy. Úlken otbasylarǵa sáıkesinshe keń bólmeler usynyldy. Kúnine úsh ret jaqsy tamaqtandyrady», - deıdi Talıtsa aýylynyń turǵyny Ásel Qadyrbekova.

Evakýatsııalanǵan 28 balanyń arasynda bıotsentrge, qalalyq murajaılarǵa jáne oıyn-saýyq ortalyqtaryna tegin saparlar uıymdastyryldy. Jataqhanada eki aýysymda Semeı temirjol aýrýhanasynyń dárigerleri kezekshilik etip, dári-dármektermen qamtamasyz etýde.

«Keshe bárimizdi monshaǵa apardy, jýynýǵa qajetti zattar, súlgiler berildi. Evakýatsııa kezinde úı aıaq kıimimen shyqqan zeınetkerge yńǵaıly aıaq kıim ákelindi. Jalpy, kıim, aıaq kıim jáne basqa da qajetti zattar mol. Bizge qajet nárseniń bári bar. Ol úshin oblys basshylyǵyna, eriktilerge jáne barlyq beı-jaı qaramaıtyn adamdarǵa úlken rahmet», - dedi Talıtsa aýylynyń turǵyny Irına Shırıan.

Abaı oblysynyń ákimi Nurlan Uranhaev evakýatsııalyq pýnktterge baryp, turǵyndardyń qal-jaǵdaıymen tanysty. Sonymen qatar aýyl turǵyndaryna órttiń qazirgi jaǵdaıy týraly aıtyp berdi.

«Eldi mekenderge órt qaýip tóndirmeıdi. Sizderdi qatty tútin bolǵandyqtan ǵana evakýatsııalaýǵa týra keldi. Órtpen kúres jalǵasýda. Árıne, jeldiń ekpini jaǵdaıdy qıyndatýda», - dedi aımaq basshysy.

Búgingi tańda úsh evakýatsııalyq pýnktte 189 adam ornalastyrylǵan. Budan bólek, Semeıde 800 adamdy qabyldaýǵa múmkindik beretin 9 pýnkt jabdyqtalǵan.