Abaı oblysynda jol boıynda otyrǵan adamdy kólik qaǵyp, mert qyldy

ASTANA. QazAqparat - Abaı oblysynyń Kókpekti aýdanynda er adamdy kólik qaǵyp, mert qyldy, – dep habarlaıdy QazAqparat Polisia.kz saıtyna silteme jasap.

13 tamyz kúni saǵat 22:22 shamasynda «102» arnasyna oblys ortalyǵynyń 46 jastaǵy turǵynynan Jansary aýylynyń mańyndaǵy Kókpekti – Vasılev ótkeli tasjolymen júrip kele jatyp, kóligimen tas jolda otyrǵan belgisiz bir adamdy qaǵyp ketkeni týraly habar túsken.

Jol-kólik oqıǵasy saldarynan er adam sol jerde alǵan dene jaraqatynan qaıtys boldy.

Atalǵan fakti boıynsha QR QK-niń 345-baby 3-bóligi (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) boıynsha sotqa deıingi tergeý bastaldy.

Qazirgi ýaqytta birqatar sot saraptamasy taǵaıyndaldy, olardyń nátıjeleri boıynsha is júrgizý sheshimi qabyldanady.

«Qylmystyq-protsestik kodekstiń 201-babynyń 1-bóligine sáıkes sotqa deıingi tergep-tekserýdiń derekteri jarııa etilýge jatpaıdy»,-delingen habarlamada.