Abaı oblysynda janýarlar dúnıesin qorǵaý maqsatynda ańshylyq alqaptar bekitilýde
Abaı oblysy ákimdiginiń málimetine súıensek, óńir boıynsha ańshylyq alqaptardy bekitý jumystary qolǵa alyndy.
«Ańshylyq alqaptardy bekitý – brakonerlikti tómendetý, janýarlar dúnıesin qorǵaý men ósimin molaıtý maqsatynda júrgiziledi. Alqaptar bekitilgennen keıin sharýashylyqtarǵa janýarlar dúnıesin qorǵaý jáne janýarlardy azyqtandyrý mindetti bolady. Búginde Abaı oblysynyń aýmaǵynda 19 ańshylyq alqap bar. Onyń 8-i bekitilgen jáne 11-i rezervtik qorda ornalasqan. Onda janýarlardyń 30-dan astam túri mekendeıdi», - delingen aqparatta.
Bekitilgen ańshylyq alqaptarynda ańshylyq sharýashylyqtar shart aıasynda bıotehnıkalyq is-sharalardy júrgizýge mindetteledi. Sondaı-aq janýarlar túrleriniń sanyn esepke alý, derekterdi taldaý júrgizetin bolady.
«Budan bólek, Abaı oblysynyń tabıǵı resýrstar jáne tabıǵat paıdalanýdy retteý basqarmasy gosreestr.kz veb-portalynda ańshylyq alqaptardy elektrondyq túrde bekitý boıynsha konkýrs ótkizip jatyr», - delingen habarlamada.