Abaı oblysynda jalaqy ala almaı otyrǵan mashına jasaý zaýyty qyzmetkerleriniń máselesi sheshildi
Abaı oblysy ákimdiginde «Áleýmettik áriptestik, eńbek jáne áleýmettik qatynastardy retteý» jónindegi oblystyq úshjaqty komıssııanyń kezekti otyrysy ótti. Jıynda birqatar mańyzdy másele qaraldy. Onyń biri – «Semeı mashına jasaý zaýyty» AQ jáne «Teplokommýnenergo» MKK qyzmetkerleriniń jalaqy bereshegin óteý.
«Búginde «Semeı mashına jasaý zaýyty» AQ jalaqy bereshegin óteý maqsatynda sanator «Oljakol» JShS men qyzmetkerlerdiń ókili arasynda memorandým jasalyp, 2023 jylǵy 13 qyrkúıekke deıin tolyq tóleý kestesi jasalǵan. Jıynda kásiporynnyń jańa basshylary barlyq bereshekti ýaqytynda jabatynyn jetkizdi», - dep habarlady oblys ákimdiginiń baspasóz qyzmeti.
«Teplokommýnenergo» MKK-niń eńbek ujymy aldynda shilde aıyna bereshegi bar. Taldaý kórsetkendeı, jyl saıyn jaz kezinde kásiporynda jalaqydan bereshek paıda bolady. Qazir qyzmetkerlerdiń jalaqysyn tóleý joldary qarastyrylyp jatyr.
Sondaı-aq jıynda «SHARCEM» JShS jáne «KAZ Minerals Aktogay» JShS-de jergilikti turǵyndardy jumysqa ornalastyrý, sheteldik jumysshylar men qazaqstandyq jumysshylardyń arasynda aıyrmashylyqty boldyrmaý jáne jalaqyny kóterý jaıy sóz etildi.
«SHARCEM» JShS kásiporny qyzmetkerleriniń jalaqyny kóterý týraly talabyna qatysty jaǵdaıdy retteý úshin kompanııa basshylyǵy, Jarma aýdanynyń ákimi jáne aýdan prokýrory ujymmen kezdesý ótkizdi. Kelissózder nátıjesinde jumys berýshi 200 qyzmetkerdiń jalaqysyn kóterý týraly sheshim qabyldady. Jumysshylardyń turmystyq jaǵdaıyn jaqsartý maqsatynda kásiporyn ashanasy men jataqhanasyn jóndep, osy aıda aıaqtaýdy josparlap otyr.
«Aıagóz, Jarma aýdanynyń ákimderi jumyspen qamtý jáne áleýmettik baǵdarlamalardy úılestirý basqarmasymen birlesip «KAZ Minerals Aktogay», «SHARCEM» kásipornyndaǵy bos jumys oryndaryna birinshi kezekte jergilikti turǵyndardy jumysqa ornalastyrýdy qarastyrsyn», - dedi aımaq basshysy Nurlan Uranhaev.
Aqtoǵaı jáne Qopa aýyly turǵandaryn jumyspen qamtý maqsatynda «KAZ Minerals Aktogay» JShS kásiporny óz qarajatyna jańa mamandyqty meńgerýge nemese qaıta daıarlaýdan ótýdi uıymdastyryp jatyr. Búginde Semeı qalasyndaǵy Elektrotehnıkalyq kolledjimen kelisip, 3 aılyq qysqa kýrstar ashty. Birinshe kezekte 15 adamdy oqytyp, baǵdarlama nátıjesin berse, oqytatyn adam sanyn kóbeıtý kózdelýde.