Abaı oblysynda ulttyq quryltaıda kóterilgen keleli máseleler talqylandy

SEMEI. QazAqparat - Abaı oblysynda Qasym-Jomart Toqaevtyń «Ádiletti Qazaqstan – Adal azamat» ulttyq quryltaıynyń ІІ otyrysyn talqylaýǵa arnalǵan jıyn ótti. Shara barysynda mádenıetti, ulttyq biregeılikti damytý jáne jastardy tárbıeleý máseleleri qaraldy, dep habarlaıdy QazAqparat.

Abaı oblysynyń ákimi óz sózinde Memleket basshysy ulttyq biregeılikti qalyptastyratyn mańyzdy aspektilerdi qozǵaǵanyn aıtty.

«Ótken senbide elimizdiń rýhanı astanasy Túrkistanda Ulttyq quryltaıdyń ІІ otyrysy ótti. Shekara mańyndaǵy aýdandardyń taǵdyry halyqtyń tolǵandyratyn máseleleriniń birine aınaldy. Osyǵan baılanysty Prezıdent Abaı oblysynyń Maqanshy aýdanyn qalpyna keltirý týraly sheshim qabyldaǵanyn málimdedi. Bul bastama «Halyq únine qulaq asatyn memleket» tujyrymdamasy aıasynda júzege asyrylýda dep senimmen aıtýǵa bolady», - dedi Nurlan Uranhaev.

Óz kezeginde QR Parlamenti Májilisiniń depýtaty Nurtaı Sabılıanov Maqanshy aýdanyn damytý jóninde usynystaryn ortaǵa saldy.

Halyq qalaýlysy bilim berý, mádenıet obektilerin salý, kásipkerler úshin sýbsıdııalar, shaǵyn jáne orta bıznes pen ınternet kezekti kúttirmeıtin máseleler ekenin tilge tıek etti.

Ulttyq quryltaıda Prezıdent - ulttyq brendti, tarıhty jáne mádenıetti ilgeriletý qajettigin, sonymen qatar mádenı murany jan-jaqty nasıhattaýdy kótergen edi.

Mundaı tásil eldiń oń ımıdjin nyǵaıtýǵa járdemdesýge, syrtqy saıası bastamalardy iske asyrý jáne álemdegi bıznestiń ustanymyn nyǵaıtý úshin qolaıly jaǵdaılar qalyptastyrýǵa múmkindik beretin aıta ketken jón.

«Bizdiń dástúrlerimiz, ádet-ǵuryptarymyz, ańyzdarmen tarıhymyzdy zamanaýı tehnologııalar arqyly ilgeriletýge bolady. Biz balabaqshalarǵa arnalǵan 3D-oıynshyqtardy ázirleýdemiz. Olar balalardyń usaq motorıkasyn damytyp qana qoımaı, bizdiń mádenıetimizdi úıretedi. Ár oıynshyq ulttyq naqyshta jasalǵan. Sondaı-aq, biz anımatsııalyq mýltfılmder men mobıldi oıyndar shyǵarýǵa daıynbyz. Onda elimizdiń tarıhyn tereń berýdi maqsat tutyp otyrmyz», - dedi «Abai IT-Valley» tehnoklasteriniń negizin qalaýshy Ashat Beısembaev.

Alqaly jıynda jastardy tárbıeleý, olardyń ózin-ózi tanýy úshin jaǵdaı jasaý, salaýatty ómir saltyn nasıhattaý taqyryptary da talqylandy.

«Kóptegen mańyzdy aspektiler talqylandy. Eger quryltaı týraly aıtatyn bolsaq, ol jerde áleýmettanýǵa, áleýmettik tanymǵa nazar aýdarylǵanyn atap ótken jón. Memleket basshysy áleýmettanýǵa kóp qarajat jumsalǵanyn, biraq nátıje joq ekenin de aıtty. Sondyqtan bolashaqta áleýmettaný ortalyǵy da paıda bolýy kerek. Bul bizdiń jastar úshin úlken múmkindik. Abaı oblysynda da oǵan qajetti múmkindikter jasalýda», - dedi QR Parlamenti Májilisiniń depýtaty Samat Nurtaza.

Qorytyndylaı kele Abaı oblysynyń ákimi Nurlan Uranhaev ár adamnyń óńirdiń damýyna qosqan úlesi erekshe mańyzdy ekenin atap ótip, jıynda aıtylǵan usynystar men tilekterdi nazarǵa alynatynyn jetkizdi.