Abaı oblysynda shomylýǵa bolatyn 10 ýchaske belgilendi

SEMEI. QazAqparat – Abaı oblysynda sýǵa túsýge bolatyn 10 ýchaske belgilendi. Bul týraly Óńirlik kommýnıkatsııalar qyzmetinde ótken baspasóz máslıhatynda óńirlik Tótenshe jaǵdaılar departamenti Azamattyq qorǵanys basqarmasynyń basshysy Dáýren Aǵajaev aıtty, dep habarlaıdy QazAqparat tilshisi.

«2022 jyly aımaqtaǵy sý aıdyndaryna 20 adam sýǵa batyp ketti. Onyń tórteýi – bala. Eń kóp ólim-jitim Ertis ózeninde (12 adam), qalǵany tabıǵı sý qoımalarynda (Shúlbi sý qoımasy – 2 adam, Shar ózeni – 1 adam, Alakól – 4 adam, Arasan kóli – 1 adam) tirkeldi. Adamdar mas kúıde, ruqsat etilmegen jerlerde sýǵa túsetindikten, shomylýdy bilmegendikten osyndaı qaıǵyly jaǵdaıǵa dýshar bolady», - deıdi Dáýren Aǵajaev.

Departament oqys oqıǵalardyń aldyn alý úshin bıyl óńirde sýǵa túsýge bolatyn 10 ýchaskeni daıyndady. 20 ýchaskede sýǵa túsýge tyıym salynǵan. Bul aımaqtarda volonterler men polıtsııa qyzmetkerleri reıd júrgizedi. «Sýǵa túsý maýsymy bastalmas buryn jaǵajaılardyń tereńdigine sholý jasaý, arnaıy qalqymalar, eskertý belgilerin, úgit-nasıhat stendterin qoıý, sondaı-aq qutqarýshylardy oqytý josparlanýda. Búgingi tańda qalalar men aýdandardyń ákimdikteri 4 kommýnaldyq jaǵajaı salýdy josparlap otyr. Qazir óńirde tek Alakólde ǵana kommýnaldyq jaǵajaı bar. Bıyl Semeıde «Zarıa» jáne Prıstan aýdandarynda, Kýrchatovta «Maıak» qonaqúıiniń mańynda jáne kelesi jyly Kókpekti aýdanynda kommýnaldyq jaǵajaı ashý oıda bar», - deıdi basqarma basshysy.

Foto Abaı oblysy ákimdiginiń baspasóz qyzmetinen