Abaı oblysynda saılaý ýchaskelerinde sýrdoaýdarmashylar jumys isteıdi

SEMEI. QazAqparat – Abaı oblysynda aldaǵy prezıdent saılaýynda 475 ýchaske jumys isteıdi, dep habarlaıdy QazAqparat tilshisi.

Oblys ákimdiginiń málimetinshe, óńir boıynsha 475 daýys berý ýchaskesi quryldy. Onyń ishinde 36-sy jabyq saılaý ýchaskesi.

«Saılaýshylardyń tolyq tizimi 30 qazanda saılaý ýchaskelerine berildi. Árkim óz saılaý ýchaskesin ákimdiktiń resmı saıtynan bile alady. Sondaı-aq qajetti aqparat pen keńes alý úshin «109» nómiri boıynsha biryńǵaı baılanys ortalyǵyna habarlasýǵa bolady», - deıdi oblystyq aýmaqtyq saılaý komıssııasynyń tóraǵasy Natalııa Fesenko.

Saılaý kúni óz saılaý ýchaskesinde bolmaıtyn daýys berýshiler, tirkeýden shyǵarý talonyn alyp basqa saılaý ýchaskesinde daýys bere alady. Tirkeýden shyǵarý talonyn 19 qarashada saǵat 18:00-ge deıin alýǵa múmkindik bar.

«Sondaı-aq densaýlyqqa baılanysty úıge portatıvti saılaý jáshigin usynýǵa ótinish berýge bolady. Saılaý ýchaskelerinde sýrdoaýdarmashylar da jumys isteıdi, Braıl kestesi bar trafaretter jáne nashar kóretinderge arnalǵan úlkeıtkish lýpalar usynylady. Daýys berý 20 qarasha kúni tańǵy saǵat 7:00-den 20:00-ge deıin ótedi», - deıdi Natalııa Fesenko.