Abaı oblysynda ormandaǵy alapat órt qaıtalanbas úshin ne istelip jatyr
Oblystyq tótenshe jaǵdaılar departamentiniń bastyǵy Manarbek Shapaǵatov baspasóz máslıhatyna qatysyp, óńirde órt qaýpi joǵary kezeńniń qalaı ótip jatqanyn aıtyp berdi.
«Abaı oblysynyń aýmaǵynda bıylǵy órt qaýpi joǵary kezeń bastalǵaly 175 orman órti tirkelgen. Bul kórsetkish ótken jylmen salystyrǵanda 24,7%-ǵa tómendedi. Alaıda órt sharpyǵan aýdan kólemi 66 myń gektardy qurap, 85 esege artyp otyr. Oǵan árıne, Semeı ormanyndaǵy alapat órt sebepker. Orman órtterimen kúrestiń tıimdiligi tilsiz jaýdyń der kezinde anyqtalýyna, sol jerge tehnıka men adamdardyń jedel jetýine, qajetti qural-jabdyqtarmen jabdyqtalýyna baılanysty. Sondaı-aq orman sharýashylyǵy mekemeleri qyzmetkerleriniń shtattyq sany, tıisti deńgeıge qarjylandyrylýy jáne orman alqaptary mańyndaǵy avıatsııalyq tehnıkalardyń bolýy asa mańyzdy», - deıdi ol.
Aımaqtyq shalǵaı eldi mekenderindegi jumys istep turǵan órt sóndirý beketterinde ázirlikti kúsheıtý jáne eskirgen tehnıkany jańartý maqsatynda departament tarapynan jergilikti atqarýshy organdardyń balansyna 8 órt sóndirý tehnıkasy tapsyryldy. Sonymen qatar qazirgi tańda aýyldardaǵy órt sóndirý beketterinde tehnıkalardy jańartý jumystary júrgizilip jatyr.
«Besqaraǵaı, Borodýlıha, Aıagóz jáne Jarma aýdandarynda órt beketterin qurý úshin 5 órt sóndirý tehnıkasy beriledi. Tabıǵı órtterge qatysty jaǵdaıdy turaqtandyrý úshin máseleni keshendi sheshý kerek», - deıdi Manarbek Shapaǵatov.
Eske salsaq, bıyl 8 maýsym kúni Abaı oblysyndaǵy «Semeı ormany» rezervaty aýmaǵynda alapat órt shyqqan bolatyn.