Abaı oblysynda muqtaj azamattarǵa kómek kórsetetin arnaıy komıssııa qurylmaq

SEMEI. QazAqparat – Abaı oblysynda kómekke muqtaj azamattardy qoldaýǵa arnalǵan arnaıy komıssııa qurylmaq. Bul týraly «Ashyq» NQA portalynda jarııalanǵan óńir ákimdiginiń qaýlysynda jazylǵan, dep habarlaıdy QazAqparat tilshisi.

«Komıssııanyń negizgi mindeti - jergilikti ókildi organdar bekitetin azamattardy muqtajdar sanatyna jatqyzý úshin negizdemeler tizbesine sáıkes, azamattardyń áleýmettik kómekke muqtajdyǵyn jáne ómirlik qıyn jaǵdaılar týyndaǵan kezde beriletin áleýmettik tólemderdiń mólsherin aıqyndaý. Sonmen qatar, árbir jekelegen jaǵdaıda áleýmettik kómektiń mólsherin kórsete otyryp, áleýmettik kómek kórsetý qajettigi týraly qorytyndy shyǵarý bolyp tabylady», - delingen qujatta.

Qaýlyda kórsetilgendeı, komıssııa quramyna jergilikti atqarýshy organdardyń múddeli qurylymdyq bólimsheleriniń, uıymdardyń jáne qoǵamdyq birlestikterdiń qyzmetkerleri enedi. Komıssııa tóraǵadan, hatshydan jáne komıssııa múshelerinen quralady. Onyń jalpy quramy jeti adamnan kem bolmaýǵa tıis.

Qujatty ashyq talqylaý 27 aqpanǵa deıin jalǵasady.