Abaı oblysynda memlekettik satyp alýǵa qatysty 17,6 mlrd teńgeniń zań buzýshylyǵy anyqtaldy

ASTANA. QazAqparat - Abaı oblysynyń prokýratýrasy bıyl quny 17,6 mlrd teńge bolatyn 304 memlekettik satyp alý boıynsha zań buzýshylyqtyń aldyn aldy, dep habarlaıdy oblystyq prokýratýranyń baspasóz ortalyǵy.

Abaı oblysy prokýratýrasynyń organdary bıýdjet qarajatyn jumsaýdyń zańdylyǵyna, atap aıtqanda júıeli zań buzýshylyqtardy anyqtaýǵa jáne olardyń zańsyz ıgerilýine jol bermeýge erekshe nazar aýdarady.

Aǵymdaǵy jyly quny 17,6 mlrd teńge bolatyn 304 memlekettik satyp alý boıynsha zań buzýshylyq anyqtaldy, onyń ishinde 12,7 mlrd teńgeden astam somaǵa 55 zańsyz satyp alýdyń aldyn aldy.

Ákimshilik jaýapkershilikke 10 tulǵa, onyń ishinde 1 aýdandyq mańyzy bar qalanyń ákimi, tártiptik jaýapkershilikke 27 tulǵa, onyń ishinde 2 kent ákimi jáne 2 aýdandyq bólim basshysy tartyldy.

Eń jıi buzýshylyqtar satyp alýdy ótkizýdiń tıisti emes tásilimen, olardy mindetti bolǵan kezde jobalyq-smetalyq qujattamasyz jarııalaýmen, básekelestik ortany boldyrmaıtyn joǵary talaptar qoıýmen baılanysty.

Sondaı-aq, bıýdjetti tıimsiz josparlaý faktileri anyqtaldy.

Mysaly, 440 mln teńgege joldardy ortasha jóndeýge konkýrs jarııalanǵan kezde tehnıkalyq erekshelikte jol ýchaskesi kórsetilgen, bul boıynsha «QazAvtoJol» UK» AQ-nyń jóndeýi josparlanǵan.

Prokýratýra aktisi boıynsha konkýrs toqtatyldy, bólingen 294 mln teńge joldyń basqa muqtaj ýchaskesin jóndeýge qaıta bólý josparlanýda.

Basqa jaǵdaıda, kósheni jaryqtandyrý jumysy josparlanǵan, degenmen is júzinde múlde jasalmaǵan jáne ony salýdy qajet etedi.

Bul konkýrs habarlandyrý satysynda toqtatyldy, kináli tulǵalar jaýapqa tartyldy.