Abaı oblysynda evakýatsııalanǵan turǵyndardyń úılerin polıtseıler kúzetýde –ІІM

ASTANA. QazAqparat – Abaı oblysyndaǵy alapat orman órti qaýpinen evakýatsııalanǵan aýyl turǵyndarynyń úıleri men jeke múlki polıtseılerdiń qaraýynda. Bul týraly Іshki ister mınıstrligi Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova málim etti, dep habarlaıdy QazAqparat tilshisi.

«Abaı oblysyndaǵy jaǵdaı áli de kúrdeli. Táýekel aımaqtarynda tótenshe jaǵdaı qyzmetkerlerimen birge polıtseıler jáne Ulttyq ulannyń qyzmetkerleri jumys istep jatyr. Órt aýmaǵynan kóshirilgen eldi meken turǵyndarynyń úılerin, jeke múlki men sharýashylyq qojalyqtaryn tártip saqshylary kúzetýde», - dedi Aqtoty Boranov Іshki ister mınıstrliginde ótken brıfıngide.

Onyń aıtýynsha, búginde Abaı oblysynyń Borodýlıha aýdanyna qosymsha kúshter jiberildi.

«Tártip saqshylary kólikter qozǵalysyn uıymdastyrý jáne retteý, sondaı-aq tótenshe jaǵdaı rejımi talaptaryn saqtaýdy qamtamasyz etýde. Qaýipsizdikti qamtamasyz etý baǵytyndaǵy jumystar jalǵasyp jatyr», - deıdi ol.

Buǵan deıin Abaı oblysyndaǵy órtke baılanysty qansha jáne qandaı aýyl turǵyndarynyń evakýatsııalanǵany týraly habarlaǵan edik.

Eske salaıyq, «Semeı» ormany rezervatynda órt 8 maýsym kúni shyqqan bolatyn.
Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Tilsiz jaýdy aýyzdyqtaýǵa jumyldyrylǵan 14 ormanshy qaza boldy. Barlyǵy memlekettik nagradaǵa usynyldy.

Semeı ormanyndaǵy órt faktisi boıynsha qylmystyq is qozǵaldy.

Úsh aýyldyń turǵyndary qaýipsiz jerge evakýatsııalandy.

10 maýsym kúni túste jalyn sharpyǵan aýmaq 60 myń gektardan asyp ketkeni habarlandy.

Keshe Prezıdent Qasym-Jomart Toqaev jumys saparymen Abaı oblysyna bardy.

Memleket basshysy orman alqaptaryndaǵy órt sóndirý jumystarymen tanysyp, shuǵyl áreket etý shtabynyń otyrysyn ótkizdi jáne órt kezinde qaza tapqan orman sharýashylyǵy qyzmetkerleriniń týystarymen kezdesti.

12 maýsym Semeı ormanyndaǵy alapat órtten qaza bolǵandardy aza tutý kúni bolyp jarııalandy.

Búgin Abaı oblysynyń polıtsııasy traktorymen órt sóndirýge ketken taǵy bir adamnyń izdestirilip jatqanyn habarlady.