Abaı oblysynda esirtki alqabynan 4,8 myńnan astam qarasora butasy tárkilendi

SEMEI. QazAqparat – Abaı oblysy Besqaraǵaı aýdanynda anyqtalǵan esirtki alqabynan 4,8 myńnan astam qarasora butasy tárkilendi, dep habarlaıdy QazAqparat tilshisi.

Abaı oblystyq polıtsııa departamenti baspasóz qyzmetiniń málimetine súıensek, tártip saqshylary «Qarasora» jedel aldyn alý sharasy barysynda óz baqshasyn esirtki alqabyna aınaldyrǵan er adamdy ustady.

Polıtseıler Besqaraǵaı aýdanynyń turǵynynan 4,8 myńnan astam qarasora butasyn tárkiledi.

«Staraıa Krepost aýylynyń shetine kelgen polıtsııa qyzmetkerleri qorshalǵan alqapty baıqady. Kóp uzamaı 39 jastaǵy baqsha ıesi ustaldy. Qazirgi ýaqytta istiń barlyq mán-jaıy anyqtalýda», - delingen aqparatta.

Atalǵan fakti boıynsha QR Qylmystyq Kodeksiniń 300-baby 1-bóligine sáıkes (quramynda esirtki zattary bar ósirýge tyıym salynǵan ósimdikterdi zańsyz ósirý) sotqa deıingi tergeý amaldary júrip jatyr.