Abaı oblysynda dárigerlerge arnalǵan skver salynbaq

ÓSKEMEN. QazAqparat – Abaı oblysynda medıtsına qyzmetkerlerine arnalǵan skver salynady, dep habarlaıdy QazAqparat tilshisi.

Oblys ákimi Nurlan Uranhaev Semeıdegi №1 emhanaǵa baryp, qyzmetkerlermen júzdesti.

Ońaltý terapııasy, jedel medıtsınalyq kómek, balalar stomatologııasy bólimderiniń jumysymen jáne medıtsınalyq mekemeniń ambýlatorııalyq dárihana qyzmetimen tanysty.

«Emhanada aýqymdy medıtsınalyq qyzmet kórsetýge arnalǵan jabdyqtar, 11 kólik bar. Zerthananyń jumysy úshin qajetti - 7 analızator, statsıonarlyq mammograf, flıýorografııa, ýltradybystyq apparattary da satyp alynǵan. Sondaı-aq medıtsınalyq mekemede densaýlyq saqtaý júıesiniń barlyq ınnovatsııalyq baǵdarlamalary, atap aıtqanda, bala kezdegi aýrýlardy ıntegratsııalaý, qaýipsiz ana ataný, «Jas ómir» jastar densaýlyq ortalyǵy jumys istep tur», - dep habarlady Abaı oblysy ákimdiginiń baspasóz qyzmeti.

Nurlan Uranhaev emhana ujymymen jıyn ótkizip, medıtsına qyzmetkerlerine arnalǵan skver salý bastamasyn kóterdi.

Bul aq halattylardyń pandemııamen kúres jáne qoǵam densaýlyǵyn qamtamasyz etýdegi eńbeginiń belgisi retinde bolmaq.

Aıta keteıik, №1 emhana ǵımaraty 1977 jyly paıdalanýǵa berilgen.

Medıtsınalyq mekemede 90-ge jýyq dáriger men 189 orta medıtsınalyq qyzmetker jumys isteıdi.

Emhana 45 myńnan astam turǵynǵa qyzmet kórsetedi.