Abaı oblysynda baǵynysty qyzmetkeriniń sybaılas jemqorlyǵy úshin 7 basshy jaýapqa tartyldy
Abaı oblysy boıynsha sybaılas jemqorlyqqa qarsy qyzmet ókilderi jergilikti polıtsııa departamentiniń basshylyǵymen jáne ujymymen kezdesý ótkizdi. Onda quqyq qorǵaý organdarynyń qyzmetkerleri arasynda sybaılas jemqorlyqtyń aldyn alý mańyzdylyǵy jaıly sóz etildi.
«Máselen, Semeı qalalyq Polıtsııa basqarmasy tártip saqshysynyń para alý faktisi anyqtaldy. Engizilgen usynymnyń qorytyndysy boıynsha kináli laýazymdy tulǵa men onyń basshylyǵy teris sebeptermen jumystan shyǵaryldy. Jalpy bir jylda óńir boıynsha quqyq qorǵaý organdarynda baǵynysty qyzmetkeriniń sybaılas jemqorlyǵy úshin 7 basshy jaýapqa tartylǵan», - dep habarlady vedomstvodan.
Kezdesý barysynda Abaı oblysy boıynsha sybaılas jemqorlyqqa qarsy qyzmet basshysynyń orynbasary Danııar Aqýan qaramaǵyndaǵy qyzmetkerlerdiń sybaılas jemqorlyǵy úshin jáne ujymda jemqorlyqtyń aldyn alý sharalaryn qoldanbaǵany úshin basshylardyń arnaıy jaýapkershiligin eske salyp, tek zań sheńberinde jumys isteý qajettigin aıtty.
Sondaı-aq Abaı oblysynyń polıtsııa departamenti bastyǵynyń birinshi orynbasary Berik Amangeldi sybaılas jemqorlyqtyń aldyn alý boıynsha júrgizilip jatqan jumystar týraly baıandady.