Abaı oblysynda aýyldarǵa keń jolaqty ınternet jetkizý úshin «Jol kartasy» ázirlenýde

SEMEI. QazAqparat – Bıyl Abaı oblysyndaǵy 3 aýdanǵa keń jolaqty ınternet jetkizý úshin 9 antenna-dińgek qurylǵysy ornatylady, dep habarlaıdy QazAqparat tilshisi.

Qazir Abaı oblysynda óńirdegi eldi mekenderdi keń jolaqty ınternet jelisine qosý úshin «Jol kartasy» jobasy ázirlenýde. Bul týraly Kókpekti aýdanynda aımaq basshysy Nurlan Uranhaevtyń tóraǵalyǵymen ótken kóshpeli apparattyq keńes barysynda aıtyldy.

Oblystyq energetıka jáne TKSh basqarmasynyń basshysy Bolat Ábdiralıevtiń aıtýynsha, lıtsenzııalyq kelisim aıasynda oblys ákimdigi elektr jelisin tarta otyryp, 26 antenna-dińgek qurylysyn salýdy josparlap otyr.

Máselen, aǵymdaǵy jyly Abaı, Úrjar, Jarma aýdandarynyń aýyldarynda 9 AMS qurylysy bastalady. Kelesi jyly taǵy 17 AMS qurylysy josparlanǵan, onyń 11-iniń jobasy daıyn (Aıagóz, Besqaraǵaı, Aqsýat aýdandarynda) jáne 6 qurylystyń jobasy ázirlený ústinde (Semeı qalasyna qarasty Aqbulaq, Abyraly, Qaraóleń aýyldyq okrýgteri, Borodýlıha jáne Kókpekti aýdandary). Sonymen qatar, 4 AMS jeke qarajat esebinen salynady.

Jergilikti ákimdikterdiń aqparatyna súıensek, oblystaǵy aýyldyq eldi mekenderdiń tek 66,7 paıyzynda nemese 222-sinde ǵana ınternet bar (onyń ishinde 134 aýyl symdy jáne mobıldi ınternetpen qamtamasyz etilgen, 75 eldi mekende mobıldi ınternet, 13 aýylda symdy ınternet qoljetimdi).