Abaı oblysynda asylyp qalǵan oqýshynyń synyptasy da sýıtsıd jasaǵany jaıly aqparat jalǵan – Bilim basqarmasy
Jarma aýdany Úshbıik aýylynda 15 jastaǵy oqýshy asylyp qalǵan bolatyn. BAQ-ta jáne áleýmettik jelide onyń synyptasy da sýıtsıd jasamaq bolǵany, alaıda der kezinde qutqarylǵany jaıly aqparat tarady. Biraq oblystyq Bilim basqarmasynyń málimetine súıensek, ol óz ózine qol jumsamaǵan.
«Bul - jalǵan aqparat. Ekinshi bala jaı ǵana sabaqtan qashyp ketken. Mektepke kelmegen soń ony synyp jetekshisi izdedi. Birden balanyń úıine barǵan. Ata-anasy da balasyn izdep, qoraǵa kirgende ol sol jerde shokolad jep otyrǵan», - deıdi basqarma basshysynyń orynbasary Ásem Núskenova.
Onyń aıtýynsha, atalmysh fakti boıynsha Jarma aýdanynyń quqyq qorǵaý organdary tarapynan tergeý jumystary júrgizilýde.
«Oqıǵa bolǵan kúni aýdan ákimi orynbasarynyń tóraǵalyǵymen mobıldi top quryldy. Mobıldi top Úshbıik aýylyna baryp, bilim berý uıymyndaǵy profılaktıkalyq jumystyń jaı-kúıine taldaý júrgizdi. Sonyń qorytyndysy boıynsha mektep dırektory sotqa deıingi tergeý amaldary aıaqtalǵansha qyzmetinen shettetildi, mektep psıhology men synyp jetekshisi qyzmetterinen bosatyldy», - deıdi Ásem Núskenova.
Foto: baku.ws