Abaı oblysynda áleýmettik osal sanattaǵy azamattarǵa kómir arzandatylǵan baǵamen satylady

SEMEI. QazAqparat – Abaı oblysynyń ákimi Nurlan Uranhaev ákimdik jınalysyn ótkizip, birqatar mańyzdy máselelerdi talqylady, dep habarlaıdy QazAqparat tilshisi.

Jınalys barysynda jańa oqý jylyna deıin mektepterdi jóndeý, aýrýhanalardy zamanaýı medıtsınalyq jabdyqtarmen qamtamasyz etý jáne aldaǵy jylytý maýsymyna daıyndyq jaıy sóz etildi. Aımaq basshysy mektepterdegi jóndeý jumystary barysyn qatań baqylaýǵa alyp, merdigerlermen jumysty kúsheıtýdi tapsyrdy.

«Jańa oqý jylyna deıin barlyq jóndeý jumystary aıaqtalýy qajet. Bilim ordalaryndaǵy oqý protsesteriniń qaýipsizdik sharalaryn aldyn ala uıymdastyrýdy tapsyramyn», - dedi Nurlan Uranhaev.

Búginde oblysta medıtsınalyq mekemelerdi júıeli túrde zamanaýı tehnıkamen jabdyqtaý jumystary júrgizilip jatyr.

«Densaýlyq saqtaý basqarmasy mınımaldy standarttarǵa sáıkes medıtsınalyq mekemelerdi sapaly tehnıkamen jabdyqtaýdy qatań baqylaýǵa alýy qajet. Sondaı-aq halyq sany az eldi mekenderde únemi júıeli túrde mindetti áleýmettik medıtsınalyq saqtandyrý týraly úgit-nasıhat jumystaryn júrgizý kerek», - dedi ákim.

Búginde eń mańyzdy máselelerdiń biri – jylýmen qamtamasyz etý. Nurlan Uranhaev qala jáne aýdan ákimderine halyq arasynda kómirdi jazǵy ýaqytta satyp alý týraly túsindirý jumystaryn júrgizý qajettigin atap ótti.

«Qarajyra» aktsıonerlik qoǵamymen birlesip áleýmettik osal toptaǵy azamattarǵa kómirdi áleýmettik baǵamen satý týraly usynysty 10 kún aralyǵynda engizýlerińiz qajet. Semeı, Aıagóz qalalarynyń jáne Abaı aýdanynyń ákimderine Energetıka basqarmasymen birlesip, jylý júıeleri men qazandyqtardyń jóndeý jumystaryn 30 qyrkúıekke deıin aıaqtaýdy tapsyramyn», - dedi óńir basshysy.

Eske salsaq, osyǵan deıin Abaı oblysynda 40 myńǵa jýyq oqýshy tegin tamaqpen qamtylatyny týraly habarlanǵan.