Abaı oblysynda 5 merdiger uıym úılerdi sapasyz salǵan
«Qurylys-montajdaý jumystaryn sapasyz júrgizgen 5 merdiger uıym ákimshilik jaýapkershilikke tartyldy. Eń óreskel buzýshylyqtar Semeı qalasynyń kópqabatty turǵyn úıleriniń qurylys nysandarynda anyqtaldy», - dedi Abaı oblysynyń baqylaý basqarmasy basshysynyń mindetin atqarýshy Azamat Baıqazaqov Óńirlik kommýnıkatsııalar qyzmetinde ótken baspasóz máslıhatynda.
Basqarma basshysy kelip túsken ótinishter negizinde kópqabatty turǵyn úılerdiń 19 obektisinde jospardan tys tekserý júrgizilgenin, onyń 15-i jobalaý-smetalyq qujattamadan aýytqýmen salynǵanyn aıtty. Sondaı-aq buryn paıdalanylǵan materıaldar qurylysqa qaıta jaratylǵany anyqtaldy.
«Taldaý kórsetkendeı, kóp jaǵdaıda qurylys sýbektileri salalyq zańnamany bilmeýden, jobalaý qujattamasynyń sapasyz daıyndalýynan, merdiger uıymdardyń qurylys-montajdaý jumystaryn sapasyz oryndaýynan, tehnıkalyq jáne avtorlyq qadaǵalaý tarapynan baqylaýdyń álsizdiginen osyndaı buzýshylyqtarǵa jol beredi. Bul, saıyp kelgende, qurylystaǵy zańnama men memlekettik normatıvterdiń buzylýyna ákeledi», - dedi Azamat Baıqazaqov.
Bıylǵy jyl bastalǵaly Abaı oblysynyń baqylaý basqarmasy azamattardan 397 ótinish qabyldap, qarady. Vedomstvo sáýlet-qurylys baqylaý jáne qadaǵalaý salasynda jospardan tys 46 tekserý júrgizdi. Tekserý nátıjesinde 32 sýbekt ákimshilik jaýapkershilikke tartylyp, 32 uıǵarym berildi.
Azamat Baızaqov basqarma jumysynyń qorytyndysy boıynsha jalpy somasy 23,6 mln teńgege 68 ákimshilik is qozǵalǵanyn, onyń ishinde 32 is sheshim qabyldaý úshin ákimshilik sotqa jiberilgenin atap ótti.