Abaı oblysynda 4 aýdandy sý basýy múmkin

SEMEI. QazAqparat – Abaı oblysyndaǵy Borodýlıha, Besqaraǵaı, Úrjar jáne Kókpekti aýdandaryn sý basý qaýpi bar, dep habarlaıdy QazAqparat tilshisi.

«Qazgıdromet» RMM Abaı oblystyq fılıalynyń málimetinshe, óńirdiń bir qalasy men 3 aýdanynda topyraqtyń qatý tereńdigi 50 sm-den asyp otyr.

Atap aıtqanda, Semeı (95 sm) men Abaı (123 sm), Borodýlıha (81 sm), Besqaraǵaı aýdandary (97 sm).

Qalǵan aımaqtarda topyraqtyń qatý tereńdigi 25-sm-den 46 sm-ge deıingi aralyqta.

«Qys bastalǵaly beri jergilikti atqarýshy organdar eldi mekenderden 338,4 myń tekshe metrge jýyq qar shyǵardy. Sý tasqyny kezeńine oraı 27,5 myń ydys-qap, 2,5 myń tonna ınertti materıal jáne 265 tonna janar-jaǵarmaı daıyndaldy. Qar jamylǵysy men tasqyn sýdyń ótýine ǵaryshtyq monıtorıng júrgizý maqsatynda «Qazaqstan Ǵarysh Sapary» UK AQ-men kelisimshart jasalǵan. Oblystaǵy qar qoryn aerovızýaldy zertteý jáne gıdrologııalyq jaǵdaıǵa monıtorıng júrgizý úshin «Qazavıaqutqarý» AQ tikushaqtaryn tartamyz», - dedi Abaı oblysy tótenshe jaǵdaılar departamentiniń bastyǵy Manarbek Shapaǵatov búgingi brıfıngide.

Onyń aıtýynsha, ózenderdegi qalyń muzdy jaryp, muz keptelýiniń aldyn alý úshin 52 mln teńge bólingen. Qazir daıyndyq jumystary júrip jatyr.

Kóktemdegi tótenshe jaǵdaılar kezinde zardap shekken adamdardy evakýatsııalaý úshin 5315 oryndyq 43 ýaqytsha ornalastyrý pýnkti daıyndaldy.

«2021-2023 jyldarǵa arnalǵan sý tasqynyna qarsy is-sharalardyń Jol kartasy sheńberinde josparlanǵan 12 sharanyń 8-i júzege asty. Osy baǵdarlama nátıjesinde 10 eldi mekendegi 1175 adam turatyn 433 úıdi sý basý qaýpi joıylady», - deıdi Manarbek Shapaǵatov.