Abaı oblysynda 30 myń gektarǵa jaıylǵan orman órtiniń neden shyqqany belgili boldy

ASTANA. QazAqparat Abaı oblysynyń Borodýlıha aýdanyndaǵy órtti sóndirý aýa raıynyń qolaısyzdyǵyna baılanysty qıyndap ketti. Abaı oblysy ákiminiń orynbasary Dımıtrıı Garıkov atap ótkendeı, geografııalyq jaǵdaı da óte qıyn, sebebi jer betindegi aýyr tehnıka qum tóbelerinen áreń ótedi, dep habarlaıdy QazAqparat aımaq ákimdigine silteme jasap.

Sondaı-aq, Dımıtrıı Garıkov alǵashqy órtti sóndirýge tehnıka jetkenshe órt aýmaǵy shamamen 20 gektardy quraǵanyn aıtty.

- 8 maýsym kúni saǵat 12:03-te Semeı qalasynan 25 shaqyrymdaı qashyqtyqtaǵy Batpaev orman sharýashylyǵynyń 66 kvartalynda órt shyqqany týraly habar tústi. Órt naızaǵaıdyń 2 ret soǵýynan shyqqan. Órtti tez arada aýyzdyqtaý múmkin bolmady, oǵan sebep «Semeı ormany» memelekettik orman tabıǵı rezervaty tehnıkasy bıik qum tóbeleri ornalasqan aımaqqa jete almady. Órt orman sharýashylyǵy ornalasqan jerden qashyqtyǵy 11 shaqyrymdy alsa, tehnıka jetkenshe órt aýmaǵy 20 gektardy qurady. Joǵary temperatýra men qatty jeldiń saldarynan órt eki saǵattyń ishinde 200 gektar aýmaqty sharpydy, - dedi Dımıtrıı Garıkov.

Orman órti Ýspen, Podnebesnoe, Baryshevka aýyldaryna qaýip tóndiretindikten, turǵyndar jedel túrde evakýatsııalandy barlyǵy 316 adam evakýatsııalandy).

Qoǵamdyq tártip pen turǵyndardyń múlkin qorǵaý úshin oqıǵa ornynda aýdandyq ishki isteri bólimi qyzmetkerleriniń kezekshiligi uıymdastyryldy.

Qazirgi ýaqytta Borodýlıha turǵyndaryna qaýip tónip turǵan joq.

– Órt 30 myń gektarǵa jýyq aýmaqty qamtydy. Órt saldarynan Batpaev, Kamyshen jáne Ýspen orman sharýashylyqtary zardap shekti. Túnde evakýatsııa Ýspen, Grýshovka jáne Podnebesnoe aýyldarynda júrgizildi. Eldi mekender aýmaǵyndaǵy turǵyn úılerdiń sany 200-ge jýyq. Baryshovka aýylynda bir turǵyn emes jáne 2 turǵyn úı órtten zardap shekti, dep qosty oblys ákiminiń orynbasary.

Búginde órt ornynda 600-den astam adam, 168 tehnıka, 6 tikushaq jumys istep jatyr. Kólemi 154 tonna bolatyn 55-ten astam sý shashyldy.

Batpaev, Kamyshen jáne Ýspen orman sharýashylyqtarynyń «Semeı ormany» memlekettik orman tabıǵı rezervaty aýmaǵyndaǵy órt odan ári jaıylyp jatyr.

Qazirgi ýaqytta 3 órt oshaǵy qaldy: batys bóliginde (Kamyshen orman sharýashylyǵy Kamyshenka aýyly mańynda), sondaı-aq Kashtak baǵytynda jáne jedel shtab ornalasqan Ýspen aýylynda órt órshidi.

Órttiń taralýyna jol bermeý úshin qyzmetkerler orman aýmaǵyn kúzetip júr.

Qazirgi ýaqytta aýa temperatýrasy shamamen 30 gradýsty quraıdy, bul órtti sóndirýdi aıtarlyqtaı qıyndatady, jel baǵytynyń ózgerýi jáne órttiń jaıylyp, taralýy barlyq baǵytta jumysty qıyndatyp otyr.

Apat ornynda Qazaqstan Respýblıkasy Tótenshe jaǵdaılar mınıstrliginiń vıtse-mınıstri Marat Kúldikov, Qazaqstan Respýblıkasy Tótenshe jaǵdaılar mınıstrligi Órtke qarsy qyzmet komıtetiniń tóraǵasy Nurbolat Derbisov, Abaı oblysy ákimi Nurlan Uranhaev jáne basqa da barlyq jaýapty qyzmetkerler boldy.