Abaı oblysynda 2025 jylǵa deıin 11 mektep salynady
Búgin Semeı qalasynda pedagogterdiń tamyz konferentsııasy ótti. Aldaǵy oqý jylyna maqsattar belgilenip, mindetter aıqyndalǵan sharaǵa oblys ákimi Nurlan Uranhaev qatysty.
Óz sózinde ol ınklıýzıvti bilim berýge erekshe kóńil bólýge shaqyrdy. Onyń aıtýynsha, azamattarmen turaqty túrde kezdesýler, saparlar, turǵyndardyń ótinishteri ınklıýzıvtik baǵytta belsendirek áreket etý kerektigin kórsetip otyr.
«Oblystyń barlyq mektepterinde robototehnıka kabınetteri bazasynda IT-synyptar jumys isteıdi. Ekonomıkalyq lıtseı, Shákárim atyndaǵy gımnazııa, 9, 12 jáne 22 mektepterdiń oqýshylary turaqty túrde joǵary nátıjeler kórsetip, robototehnıka boıynsha chempıonattardyń jeńimpazdary atanyp júr.
Bizde Alikhan Bokeikhan University bazasynda «Abai IT – Valley» biregeı tehnologııalyq klasteri bar. Onyń múmkindikterin paıdalaný kerek. Osyǵan baılanysty, bilim basqarmasyna mańyzdy startap-jobalardy iske asyrý úshin aımaq mektepteriniń ýnıversıtetpen ózara is-qımyly boıynsha oqýshylardyń daǵdylaryn arttyrý salasynda naqty usynystar engizýdi tapsyramyn», - dedi ákim.
Bıyl óńirde 1 700 oryndyq tórt jańa mektep ashylady. 2025 jylǵa deıin 5 100 oryndyq taǵy 11 mektep salynbaq.
«Tehnıkalyq jáne kásiptik bilim berý júıesi jańǵyrtylýda, onda 20 myńnan astam stýdent bilim alýda. Oblys «Barshaǵa arnalǵan tegin tehnıkalyq-kásiptik bilim berý» jobasyn sátti júzege asyryp keledi. Memlekettik tapsyrys tehnıkalyq jáne tehnologııalyq sala úshin kadrlar daıarlaýǵa, onyń ishinde IT, aýyl sharýashylyǵy, medıtsına men bilim berý salalarynda mamandardy daıarlaýǵa baǵyttalǵan», - dedi Nurlan Uranhaev.
Tamyz konferentsııasynyń sońynda jemisti jumys istep kele jatqan, úzdik dep tanylǵan muǵalimder marapattaldy.
Esterińizge sala ketsek, osyǵan deıin Abaı oblysynda jańa oqý jylynda 4 jańa mektep paıdalanýǵa beriletindigin habarlaǵan edik.