Abaı oblysynda 2 jańa ınnovatsııalyq mektep ashyldy
Jańa oqý jylynan bastap QR Prezıdenti Qasym-Jomart Toqaevtyń óńirlerde aqparattyq tehnologııalardy tereńdetip oqytatyn zamanaýı mektepter ashý týraly tapsyrmasyn júzege asyrý aıasynda Abaı oblysynda eki ınnovatsııalyq mektep ashyldy. Bilim ordalarynyń saltanatty ashylý rásimine oblys ákiminiń orynbasary Shalqar Baıbekov qatysty.
«Á.Bókeıhan atyndaǵy ýnıversıtet janynan ashylǵan «Alikhan Bokeikhan School» ınnovatsııalyq mektebinde 7-11 synyp oqýshylary bilim ala alady. Mektep oqýshylardy IT-ındýstrııaǵa qadam basýǵa, UBT/SAT/IELTS emtıhandaryn sátti tapsyrýǵa jáne Qazaqstan men sheteldiń aldyńǵy qatarly oqý oryndaryna túsýge daıyndaıdy. Bilim ordasy jaratylystaný-matematıka pánderin tereńdetip oqytyp, úsh tilde sapaly bilim beredi», - dep habarlady óńir ákimdiginen.
Bilim berý «Abai IT-Valley» IT-haby negizinde júrgiziledi. Bul oqýshylarǵa IT-tehnologııalardy tereńirek túsinýge jáne qoldanýǵa yqpal etedi. Alikhan Bokeikhan Sshool-de IT-ázirlemelerdi daıyndaý, ǵylymı zertteýler júrgizý, bilim berý jáne qoǵamdyq bastamalardy júzege asyrý salalary boıynsha praktıkalyq daǵdylardy damytatyn úıirmeler men klýbtar jumys isteıdi.
«Sondaı-aq Bilim kúninde Shákárim atyndaǵy ýnıversıtet janynan «Shakarim High School» joǵary mektebiniń ashylýy ótti. Mektep tek oqytýǵa ǵana emes, pedagogıkalyq bilim berý baǵdarlamalaryna túsýdi josparlaǵan daryndy oqýshylardy anyqtaýǵa jáne qoldaýǵa baǵyttalǵan. Bilim ordasynda oqytý qoǵamdyq-gýmanıtarlyq jáne jaratylystaný-matematıkalyq baǵytta qazaq jáne orys tilderinde júrgiziledi. Joǵary mektepte bilim berý jańartylǵan bilim mazmuny boıynsha júzege asyrylady», - delingen aqparatta.
«Shakarim High School» mektebinde aǵylshyn tilin qarqyndy oqytý, UBT-ny sátti tapsyrý úshin pánderdi tereńdetip oqytý jáne oqýshylardyń synı oılaýyn damytýǵa arnalǵan oqytý tehnologııalary qoldanylady. Budan bólek, oqýshylardyń jan-jaqty damýyna yqpal etetin úıirmeler de bar.