Abaı oblysynda 2 bala sýǵa batyp kete jazdady

SEMEI. QazAqparat – Borodýlıha aýdanynda sýǵa batyp bara jatqan balalar qutqaryldy, dep habarlaıdy QazAqparat Tótenshe jaǵdaılar mınıstrligi saıtynasý silteme jasap.

Oqıǵa 17 shilde kúni bolǵan. Saǵat 18:12-de «112» pýltine Borodýlıha aýdanynda eki bala sýdan qutqaryldy degen aqparat túsedi.

Aqparat jınaý barysynda 2014 jáne 2015 jyly týǵan balalar Veselovskıı toǵanynda shomylý kezinde sýǵa bata bastaǵany anyqtaldy. Olardy oqıǵa kýágeri Sergeı Mıhaılovıch Berdıýgın qutqaryp, 103 qyzmetkerlerine tapsyrǵan.

Dárigerlerdiń tekserýinen keıin balalar Borodýlıha ortalyq aýdandyq aýrýhanasyna jatqyzyldy. Jaǵdaıy qanaǵattanarlyq.

«Qurmetti azamattar, sizden ózińizge jáne jaqyndaryńyzǵa óte muqııat bolýyńyzdy, sýdaǵy qarapaıym qaýipsizdik erejelerin este saqtaýyńyzdy suraımyz:

- mas kúıde shomylmańyzdar;

- balalardy eresekterdiń qaraýynsyz qaldyrmańyzdar;

- jalǵyz shomylýdan aýlaq bolyńyzdar;

- beıtanys sý qoımalarynda shomylmańyzdar (belgisiz tereńdik, tastar, aǵashtar qaýiptiń kózi bolýy múmkin);

- shekteý belgilerinen, býıkalardan asyp júzbeńizder;

- aýa tósenishteri men avtomobıl kameralarymen shomylmańyzdar;

- kemelerge jaqyndamańyzdar.

Eger sizge qaýip tónip tursa nemese jazataıym oqıǵanyń kýágeri bolsańyz, «112» nómirine qońyraý shalyńyz», - dep eskertedi Abaı oblysy TJD baspasóz qyzmeti.