Abaı oblysynan tabylǵan altyn buıymdar ólketaný mýzeıine tapsyryldy

SEMEI. QazAqparat - Aıagóz mańyndaǵy kóne qorǵannan arheologtar baǵaly metaldan jasalǵan taqtaıshalar, janýarlardyń músinderi jáne usaq monshaqtar tapty. Búgin Semeı qalasyndaǵy oblystyq tarıhı-ólketaný mýzeıine jádigerlerdi tapsyrý rásimi ótti, dep habarlaıdy QazAqparat.

Tarıh ǵylymdarynyń kandıdaty, belgili arheolog Ǵanı Omarov bul jádigerlerdiń óńir tarıhy úshin biregeı jáne asa qundy ekenin aıtty.

«2021 jyldan beri Mádenıet mınıstrliginiń granty boıynsha Aıagóz aýdanynda salaaralyq zertteý júrgizip jatyrmyz. Eki jyldyń ishinde buryn beımálim bolyp kelgen 100-ge jýyq arheologııalyq nysandy – qorǵandardy, qonystardy, jartastaǵy beınelerdi anyqtadyq. Ótken jyly qola dáýiriniń eki qorshaýyna, al ótken jyly úsh qorǵanǵa qazba jumystaryn júrgizdik. Qorǵandardyń biri aqsúıekterge tıesili, b.z.b. 8-9 ǵasyrlar – erte dáýirdegi saq qorǵandarynyń biri», - deıdi arheolog.

Bıiktigi shamamen 3 metr bolatyn eń bıik qorǵannan eń qundy oljalar tabylǵan.

Barlyǵy 2982 altyn buıym tabyldy, onyń kópshiligi usaq monshaqtar jáne buǵy músinderi, tabaqtar da bar.

Mamandardyń aıtýynsha, qorǵannyń bir zamanda talan-tarajǵa túskenine qaramastan adam súıekteri men altyn buıymdar saqtalǵandyqtan ony Altyn adam dep baǵalaýǵa bolady.

Oblystyq tarıhı-ólketaný mýzeıiniń dırektory Qaırat Sabyrbaı Abaı óńiriniń tarıhyn tereńirek zertteý úshin arheologııalyq zertteý júrgizý josparlanyp otyrǵanyn aıtty.

Arheologtar Bozaı qorymynan tabylǵan adam óz zamanynda belgili tulǵalardyń biri bolǵanyn topshylaıdy.

Sebebi altyn buıymdarmen ǵana emes, búrkit ispetti iri quspen birge jerlengen.

Bul altyn adamnyń kelbetin qalpyna keltirýge múmkindik beredi.