Abaı oblysynan 11 adam Senattaǵy eki depýtattyq orynǵa úmitker
Bul jaıly Semeı qalalyq aqparat ortalyǵynda ótken baspasóz máslıhaty barysynda oblystyq aýmaqtyq saılaý komıssııasynyń tóraǵasy Natalıa Fesenko málim etti.
«24 tamyzda Abaı oblysynan QR Parlamenti Senatynyń depýtattaryn saılaý ótedi. Óńirden eki depýtat saılanbaq: bireýi 2017 jylǵy 28 maýsymda saılanǵan depýtattardyń, ekinshisi – 2020 jylǵy 12 tamyzda saılanǵan depýtattardyń ókilettik merzimine. Senat depýtattyǵyna kandıdattardy usyný máslıhat sessııalarynda jáne ózin-ózi usyný tártibimen júrgizildi. Zań boıynsha jergilikti máslıhat depýtaty jáne oblysta turatyn azamat depýtattyqqa kandıdat bola alady», - dedi ol.
Úmitkerlerdi usyný 13-30 shilde aralyǵynda ótti. Barlyǵy 11 adam depýtattyqqa ózin-ózi usynǵan.
«Búgingi tańda alty úmitker tirkeldi. Onyń ishinde Semeı qalasynyń ákimi Baqytjan Baıahmetov bar. Tirkeý 3 tamyzda aıaqtalady. Daýys berýge qatysqan tańdaýshylardyń 50 paıyzdan astam daýysyn alǵan kandıdat saılanǵan bolyp esepteledi. Óńirlik komıssııa daýystardy sanaý nátıjelerin eki kún ishinde ortalyq saılaý komıssııasyna usynady», - dedi Natalıa Fesenko.
Senat depýtattaryn saılaýdyń qorytyndysyn QR Ortalyq saılaý komıssııasy jeti kún ishinde belgileıdi.
Depýtattyqqa kandıdatýrasyn usynǵan 11 azamat: Aınur Arǵynbekova, Mamyrbek Qarashev, Meıramgúl Abylǵazınova, Shalqar Omarov, Laýra Arynǵojına, Ýálıhan Maıjanov, Albına Ahmetova, Anjela Maslova, Talǵat Sarmanov, Baqytjan Baıahmetov, Gúljanat Rahatqyzy. Olardyń arasynda eń egde jastaǵy kandıdat 60-ta.