Abaı oblysyn qurý ekonomıkanyń barlyq salalaryna serpin beredi – Nurjan Bekqojın

NUR-SULTAN. QazAqparat – Abaı oblysynyń qurylýy ekonomıkanyń barlyq salalaryn jandandyrýǵa yqpal etedi. Bul pikirdi «Zaısan-Ertis oblasaralyq basseındik balyq sharýashylyǵy ınspektsııasy» RMM Semeı balyq ınspektsııa bólim basshysy Nurjan Bekqojın aıtty, dep habarlaıdy QazAqparat.

Memleket basshysy Qasym-Jomart Toqaevtyń 2022 jyldyń 16 naýryzdaǵy Qazaqstan halqyna joldaýynda jańa Abaı aýdanyn quryp, Semeı qalasyn oblys ortalyǵy etip belgileý habarlanǵan edi.

«El Prezıdentiniń bul tarıhı sheshimi - óńir turǵyndarynyń kópten kútken jańalyǵy. Oblys ortalyǵy Óskemen qalasyna aýystyrylǵannan beri bizdiń qalamyzdyń oblystyq mańyzy bar basqa qalalarmen salystyrǵanda áleýmettik jáne ekonomıkalyq damýda artta qalyp kele jatqany barshaǵa aıan. Abaı oblysynyń qurylýymen ekonomıkanyń barlyq salalarynda: ónerkásiptik, qurylys, aýyl sharýashylyǵynda, balyq sharýashylyǵynda jandaný bastalady dep úmittenemiz jáne senemiz. Semeı qalasynda osy jyldary barlyq ınfraqurylym, jylýmen jabdyqtaý, joldar sapaly jóndeý kórmedi. Endi osy kemshilikterdiń barlyǵy joıylady dep oılaımyz», - deıdi N. Bekqojın.

Óz sózinde spıker QR Úkimeti qabyldaǵan 2021-2030 jyldarǵa arnalǵan balyq sharýashylyǵyn damytý baǵdarlamasy Abaı oblysynyń qurylýymen qatar tabysty iske asyrylatynyn aıtty.

«Óıtkeni kásipkerler, sharýa qojalyqtarynyń basshylary halyqtyń jáne bıýdjet qarajatynyń aǵylýyna baılanysty balyq sharýashylyǵy salasyn ınvestıtsııalaıdy jáne damytýǵa múddeli bolady. Balyq sharýashylyǵy sýbektilerine bólinetin sýbsıdııa kólemi artyp, balyq sharýashylyǵymen aınalysatyn sýbektiler sanynyń artýyna oń yqpalyn tıgizedi dep sanaımyn. Sondyqtan jańa oblystyń qurylýy ónerkásiptiń, qurylys salasynyń ǵana emes, sonymen qatar bizdiń aımaqtyń balyq sharýashylyǵynyń damýyna jáne keleshegine odan ári serpin beredi», - dedi Nurjan Bekqojın.