Abaı oblysyndaǵy kolledjderde oqýshylarǵa kásiptik baǵdarlaý lagerleri uıymdastyrylady
Maýsym aıynda óńirdegi tórt kolledjde kásiptik baǵdarlaý lagerlerin ashý josparlanyp otyr. Lagerler balalarǵa demalýmen qatar túrli salada kásibı daǵdy men qyzyǵýshylyqtardy damytýǵa múmkindik beredi. Jaz maýsymynda 400-ge jýyq balany qamtý kózdelgen.
«EKOorman» lageri Besqaraǵaı kolledjinde uıymdastyrylady. Onyń basty maqsaty - balalardyń jazǵy demalysyn tıimdi ári kóńildi ótkizýge, salaýatty ómir saltyn ustanýǵa, ekologııalyq tárbıe men bilimdi shyńdaýǵa baǵyttalǵan. Jobanyń biregeıligi - balalardyń qorshaǵan ortaǵa jáne eńbekke estetıkalyq kózqarasyn qalyptastyrýdyń ǵylymı bilim berý baǵytynda uıymdastyrylýynda. Munda landshaftty dızaın, florıstıka, gúlder, aǵashtar men kókónister otyrǵyzý, jylyjaıda jumys isteý jáne mamandyqtar boıynsha sheberlik synyptary qamtylǵan. Sonymen qatar Shoshqaly kóline ekskýrsııa bolady», - dep habarlady Abaı oblysy ákimdiginen.
Al Radıotehnıka jáne baılanys kolledjiniń bazasynda qurylǵan «SmartkriS» kásiptik baǵdarlaý lageri tanymdyq jáne jobalyq jumystar arqyly IT-quzyretter salasyna baǵyttaı otyryp, balanyń áleýmettik qalyptasýy men damýyna jaǵdaı jasaıdy. Bul jobanyń biregeıligi «World Skills» halyqaralyq standarttaryna sáıkes IT-baǵytty damytýynda. Balalar oıyn modeli arqyly jobalaryn qorǵaıdy. Kompıýterlik grafıka, veb-dızaın, baǵdarlamalaý, mobıldi robototehnıka, jelilik jáne júıelik basqarý, zattar ınterneti, aqparattyq kabeldik jeliler, elektronıka jáne CAD ınjenerlik grafıkasy sııaqty baǵyttarmen aınalysa alady.
«Geologııalyq barlaý kolledjinde «Jas geolog» kásiptik baǵdar berý lageri ashylady. Onyń maqsaty - geologııa ǵylymdaryna basa nazar aýdara otyryp, balalardyń jazǵy demalysyn uıymdastyrý, jastardy geologııa salasyna tartý jáne tanymdyq qyzyǵýshylyqtaryn damytý. Lager baǵdarlamasy aıasynda balalar mınerologııa men petrografııany, geologııany, gıdrogeologııany, magnıtometrııany, munaı men gazdy izdeýdi, qaýipsizdik tehnıkasynyń negizderin zertteıdi. Lager 60 balany qabyldaıdy», - delingen aqparatta.
Elektrotehnıkalyq kolledjdegi «ІT-lager» kásiptik baǵdar berý jazǵy lageriniń maqsaty – oqýshylardyń jumysshy mamandyqtaryna jáne óndiristik protsesterge qyzyǵýshylyǵyn damytý. Jobanyń ereksheligi – oqýshylardy hakaton, startaptar baıqaýlaryna jáne IT-baǵyttaǵy jarystarǵa qatysýǵa daıyndaý.
«Sondaı-aq Bıznes jáne servıs kolledji bazasynda turaqty túrde «Profi Camp» jazǵy demalys lageri jumys isteıdi. Lager 8 jastan 14 jasqa deıingi balalar men jasóspirimderge arnalǵan. Belsendi demalysty, saýyqtyrýdy jáne erte kásiptik baǵdarlaýdy biriktiretin baǵdarlama usynylǵan. Baǵdarlamada bes negizgi baǵyt bar: «Jas aspaz», «Tátti ómir», «Óz-ózine stılıst», «Sán jáne dızaın hanshaıymy», «Biz týrıstpiz». Bul baǵyttar balalardyń ıntellektýaldy jáne shyǵarmashylyq áleýetin ashýǵa, sondaı-aq qundy bilim men daǵdylardy ıgerýge múmkindik beredi», - delingen ákimdik málimetinde.