Abaı oblysyndaǵy aýyl muǵalimi álem ánshileriniń ánin óńdeıdi

<p>SEMEI. KAZINFORM &ndash; Abaı oblysyndaǵy aýyldardyń birinde bıologııa pániniń muǵalimi álemniń tanymal ánshileriniń ánin óńdeýmen aınalysady. Erqanat Erǵazyuly jumys istegen sheteldik juldyzdardyń tiziminde áıgili Dýa Lıpa da bar. Al qazir oǵan álemge áıgili ıspandyq ánshi Rozalııadan jańa ándi birge jazýǵa usynys túsken.</p>

Erqanat Erǵazyuly - Abaı aýdany Qaraýyl aýylynyń mamandandyrylǵan mektep-gımnazııa-ınternatynda bıologııa pániniń muǵalimi. Jas maman ózi túlep ushqan bilim ordasyna jumysqa ornalasqanyna bir jyldan asqan. Bos ýaqytynda aranjırovka jazýmen aınalysady. Áriptesteri de Erqanatty jan-jaqtty talantty ustaz deıdi. 

Foto: Kazinform

- Mektepte oqyp júrgen kezdiń ózinde shyǵarmashylyqqa jaqyn edi. On birinshi synypta mýzykalyq top qurdy. Tek án emes, bıge de ıkemi bar, - deıdi áriptesi Rollan Tleýhanov.

Erqanat Sadýhanov shoý bızneste «Eraholic» laqap atymen tanymal. Jaqynda oǵan álemge áıgili ıspandyq ánshi Rozalııadan jańa ándi birge jazýǵa usynys túsipti. 

- Ol kisi meniń áleýmettik jelidegi jumystarymdy kórip júr eken. Keıin ózi hat jazyp, birge jumys isteýdi usyndy. Qazir qandaı janrda bolatynyn pysyqtap jatyrmyz. Al, án daıyn tur. Jalpy ol týyndyny Qazaqstanda tanymal bolyp kele jatqan reggeton stılinde latyn motıvterimen shyǵarǵym keledi, - deıdi Erqanat Sadýhanov.

10 jylǵa jýyq ánderge aranjırovka jazýmen aınalysyp kele jatqan mýzykantqa qazaqstandyq ártisterden de suranys kóp. Biraq, sheteldik juldyzdarmen jıi jumys isteıdi. Óıtkeni Erqanattyń óńdeý stıli kóbine batys halyqtarynyń talǵamyna saı.

Biraq aýyl muǵalimi mýzyka tek hobbıim, al negizgi jumysym - ustazdyq etý deıdi.

Altynbek Ámıt