Abaı oblysyndaǵy 5 soǵys ardagerine 2 mln teńgeden beriledi
Óńir ákimdiginiń málimetine súıensek, 9 mamyr – Jeńis kúniniń qurmetine qalalar men aýdandar máslıhattarynyń sheshimderi negizinde birqatar sanattaǵy azamattarǵa áleýmettik kómek kórsetiledi.
Atap aıtqanda, Ekinshi dúnıejúzilik soǵystyń 5 ardagerine 2 mln teńgeden, Lenıngrad qorshaýynda bolǵan 1 adamǵa 150 myń teńge, fashıster men olardyń odaqtastary qurǵan kontslagerlerdiń, gettolardyń jáne basqa da májbúrli ustaý oryndarynyń kámeletke tolmaǵan tutqyndary bolǵan 3 adamǵa 150 myń teńgeden beriledi.
Qaıtys bolǵan soǵys múgedekteriniń nemese jeńildikteri boıynsha soǵys múgedekterine teńestirilgen adamdardyń jubaılary, soǵysta qaza tapqandardyń, partızannyń, «Lenıngradty qorǵaǵany úshin» medalimen nemese «Qorshaýdaǵy Lenıngrad turǵynyna» tósbelgisimen nagradtalǵan, jalpy syrqattaný, eńbek jaraqaty saldarynan múgedek dep tanylǵan qaıta nekege turmaǵan azamattyń jubaılary bolǵan 87 adam, soǵys jyldarynda tyldaǵy qajyrly eńbegi men minsiz áskerı qyzmeti úshin burynǵy Keńes odaǵynyń ordenderimen jáne medaldarymen nagradtalǵan 35 adam da 150 myń teńgeden alady.
«1941 jylǵy 22 maýsymnan bastap 1945 jylǵy 9 mamyrǵa deıin keminde alty aı jumys istegen jáne soǵys jyldarynda tyldaǵy qajyrly eńbegi men minsiz áskerı qyzmeti úshin burynǵy Keńes odaǵynyń ordenderimen jáne medaldarymen nagradtalmaǵan adam 2033 adamǵa 70 myń teńgeden beriledi. Jalpy oblys boıynsha birjolǵy áleýmettik kómekti 2164 adam alady», - delingen aqparatta.