Abaı oblysynda jylý elektr ortalyǵyn salatyn reseılik kompanııa ókilderimen kezdesý ótti
2024 jylǵy 17 sáýirdegi Qazaqstan Respýblıkasy men Reseı Federatsııasy arasyndaǵy úkimetaralyq kelisim sheńberinde Semeı qalasynda jylý elektr ortalyǵyn salý týraly sheshim qabyldanǵan bolatyn. Osyǵan oraı Abaı oblysy ákimdigi men «Inter RAO-Eksport» JShQ kompanııasy ókilderi arasynda kezdesý ótti.
«Kezdesýde taraptar jobany iske asyrýdyń aldaǵy josparlary men joldaryn talqylady. Osylaısha, negizgi jabdyqtyń qýaty, ornalasýy, ınjenerlik-kommýnıkatsııalyq ınfraqurylymy jáne JEO qurylysynyń merzimi aldyn ala anyqtaldy. Bolashaq jylý elektr ortalyǵyna otyn kózi de ornatyldy», - dep habarlady Abaı oblysy ákimdiginiń baspasóz qyzmeti.
Oblys ákimdigi tehnıkalyq parametrler týraly usynys engizdi. Oǵan sáıkes jańa JEO-nyń elektr jáne jylý qýaty 360 MVt jáne 1200 Gkal/saǵ quraýy tıis. Búgingi tańda jobanyń tehnıkalyq-ekonomıkalyq negizdemesi ázirlenýde.
«Buǵan deıin qurylys alańy retinde 2023 jylǵy 14 shildedegi №7 alqaly hattamalyq sheshimimen Semeı qalasynyń sol jaǵalaýyndaǵy Stepnoı kentiniń artyndaǵy aýdan bekitilgen bolatyn. Ol jer ýchaskesiniń bekitilgen aýmaǵy shamamen 60 gektardy quraıdy», - delingen aqparatta.