Abaı oblysynda polıtseıler qatty aıazda adasqan shopandardy ómirin qaterge tigip qutqardy
Polisia.kz-tiń jazýynsha, 22 aqpan saǵat 01.24-te «103» arnasynyń operatorynan Abaı oblysynyń Jarma aýdanyndaǵy Shabaq qystaýynan shamamen 4 km qashyqtyqta eki er adam kómek suraǵany týraly ótinish kelip túsken. Qońyraý shalýshy áriptesimen birge keshke qystaqtan Sýyqbulaq aýylyna shyqqan.
Jol boıynda traktordyń janarmaıy qatyp qalǵanyn jáne er adam keri qaıtaıyn dese, adasyp ketkenin habarlady. Keıbir jerlerde baılanys bolmady. Jyǵylǵanǵa judyryq bolyp telefonnyń qýaty da taýsylýǵa shaq qalǵan. Dalada kezip júrgen er adamdar shuǵyl qyzmetterge mezgil-mezgil qońyraý shalyp, qatty jaýraǵanyn habarlady. Jarma aýdanynyń ýchaskelik polıtsııa ınspektorlary dereý kómekke shaqyryldy. Іzdeý jumystary ońaı bolmaǵan. Óıtkeni Adasqandar ózderiniń koordınattaryn bere almady.
Polıtsııa qyzmetkerleri Dastan Imanov pen Erkebulan Samalhan shamamen baǵytty túsinip, traktor dóńgelekteriniń izimen shyqqan jerden adamdardy izdeý týraly sheshim qabyldady. Nıva avtokóligimen dalany aralap júrip, polıtseılerdiń ózderi qar qursaýynda qalyp, kólikti tastap, ár mınýt mańyzdy ekenin túsinip, izdeýdi jalǵastyrýǵa sheshim qabyldady. Bul ýaqytta aýa temperatýrasy -39-ǵa deıin jetken edi.
Óz ómirin qaterge tigip, úsik shalǵan polıtseıler 2 km-den keıin traktorshylardy tapty. Eń qıyny qyzmettik kólikke qaıtý joly edi, aıazdan álsiregen aýyl turǵyndaryna kómektesý kerek boldy.
– Er adamdar qýanyshtyń kóz jasyn jasyra almady, bizge alǵys aıtty. Biz olarmen birge qýandyq, adamdardy qutqarý úshin bárin jasaǵanymyzdy túsinip, tolyq tynyshtyq sezimimen úıge qaıttyq, – dedi Dastan Imanov.