Abaı oblysynda 1200 oryndyq ІT-mektep ashyldy
Jańa oqý ornynyń mindeti – qoljetimdi jáne sapaly bilim berý arqyly óńirdegi mektep tapshylyǵyn sheshýge kómektesý. Mektep zamanaýı bilim berý sharttaryna sáıkes jańa tehnologııalarmen jabdyqtalǵan. Úsh qabatty ǵımaratta fızıka, hımııa, bıologııa, ınformatıka, mýltımedııalyq synyptar, grafıka jáne modeldeý, sondaı-aq zerthanalar, telestýdııa, smart-synyptar, 3D-prınterler men robototehnıka kabınetteri ornalasqan. Mektepte 280 oryndyq akt zaly jáne 420 oryndyq ashana bar. Mektep aýdany – 3,6 gektar.
Mekteptiń kitaphanasynda 5000-nan astam kitap, onyń ishinde qazaqstandyq jáne sheteldik tanymal klassıkterdiń shyǵarmalary bar. Oqý kezinde tek statsıonarlyq kompıýterler ǵana emes, noýtbýkter de qoldanylady. Sporttyq ınfraqurylym joǵary standarttarǵa sáıkes keledi. Eki sport zaly, fýtbol, voleıbol, basketbol alańdary jáne work-out aımaǵy balalarǵa sportpen belsendi aınalysýǵa múmkindik beredi.
Mektepte bastaýysh, orta jáne joǵary synyp oqýshylary úshin úsh bólek kireberis bar. Qaýipsizdik úshin 200 beınebaqylaý kamerasy ornatylyp, ǵımaratqa kirý týrnıkettermen qadaǵalanady. Mektep terrorızmge qarsy qorǵanys júıesine engizilgen.
Mekteptiń negizgi baǵyttaryna jaratylystaný-matematıka pánderin tereńdetip oqytý, baǵdarlamalaý, jasandy ıntellekt, robototehnıka, sondaı-aq aǵylshyn tilin kásiptik damytý jatady.
«Jaıly mektep» jobasy aıasynda 2025 jylǵa deıin 11 jańa mektep ashylmaq. Jaqyn arada IT-kolledjin ashý josparda bar. Sondaı-aq, balalarǵa arnalǵan qosymsha bilim berý nysandarynyń qurylysy da kún tártibindegi ózekti máseleniń biri. Osy maqsatta oblys ortalyǵynda kópsalaly oqýshylar saraıynyń qurylysy bastaldy.