Abaı oblysynda 102 áleýmettik nysan salynbaq

<p>SEMEI.KAZINFORM &ndash; 2024 jyly óńirde 102 áleýmettik nysan salý josparda bar. Bul tizimde eń kóp densaýlyq saqtaý nysandary &ndash; 67. Aıta ketetini, jobalardyń bir bóligi ótken jyly bastalǵan. Bul týraly ÓKQ brıfınginde oblystyq qurylys basqarmasynyń basshysy Aıdyn Begimbekov málimdedi.</p>

– 2024 jyly bıýdjet qarajaty esebinen 102 áleýmettik nysan salý josparlanyp otyr. Onyń ishinde: densaýlyq saqtaý salasynda – 67, bilim berý salasynda – 16, sport salasynda – 9, mádenıet salasynda – 3, áleýmettik qamtý salasynda – 1 jáne basqa salalarda – 6 nysan, - dep atap ótti basqarma basshysy.

2023 jyly bastalǵan 14 nysan bar. Olardyń qatarynda Maqanshy aýdanynda balabaqsha, Borodýlıha aýdanynyda deneshynyqtyrý jáne saýyqtyrý ortalyǵy, Kókpekti aýdanynda basseın, Úrjar aýdanynda mádenıet úıi jáne taǵy basqa nysandar bar.

– Halyqtyń qosymsha medıtsınalyq mekemelerge qajettiligin eskere otyryp, 2024 jyly qurylys basqarmasy ınvestorlar esebinen óteýsiz negizde 5 obektiniń qurylysyna JSQ ázirleý boıynsha jumys júrgizýde. Olardyń qatarynda Semeıdegi 300 oryndyq kópsalaly balalar aýrýhanasy, oblystyq qan ortalyǵy, qalanyń oń jáne sol jaǵalaý bólikterindegi emhanalar, 400 oryndyq kópsalaly oblystyq aýrýhana bar, - dedi Aıdyn Begimbekov.

Oblystaǵy mektepterde oqýshy oryndarynyń tapshylyǵyn sheshý úshin qurylys basqarmasy 2024 jyly bilim berý ınfraqurylymyn qoldaý qorynyń qarajaty esebinen 12 jobanyń JSQ ázirleý boıynsha jumysty jalǵastyryp otyr. Alty shaǵyn mektep pen jumys istep turǵan mektepterge 6 qosymsha ǵımarat salý josparlanyp otyr.