Abaı oblysynan «Birlik kerýeni» Astanaǵa attandy
Bul kerýenniń sapary, Kóshpendiler oıyndarynyń basty nyshany jáne negizgi elementi – Sý sımvolymen tyǵyz baılanysty.
Osy rásim Uly Abaıdyń týǵan jeri Syrt Qasqabulaqta bastaý aldy. Bul jerden «Birlik kerýenin» bastap, qazaq kúresinen álem chempıony, «Qazaqstan barysy» ataǵyn ıelengen Aıbek Nuǵymarov qasıetti sýdy alyp shyqty. Sý 5-shi Dúnıejúzilik kóshpendiler oıyndarynyń ashylý saltanatynda mańyzdy oryn almaq.
«Birlik kerýeni» Semeı qalasyna kelgende, olardy qarsy alý maqsatynda Ámire Qashaýbaev atyndaǵy memlekettik fılarmonııasynyń «Bıbigúl» qazaq halyq aspaptar orkestri, «Dala úni» a kapella toby, «Dala sazy» etno-folklorlyq ansambli jáne «Tumar» bı ansambli ónerlerin kórsetti.
Qurmetke ıe bolǵan kerýen Astanaǵa qaraı jolǵa shyqty. 5-shi Dúnıejúzilik kóshpendiler oıyndarynyń ashylý saltanatynda ár óńirdiń batyrlary ózderi alyp kelgen qasıetti sýdy bir qazanǵa quıyp, bul eldiń birligin, tutastyǵyn jáne ózara yntymaqtastyǵyn kórsetetin bolady.
Sonymen qatar, dál osy kúni 5-shi Dúnıejúzilik kóshpendiler oıyndaryna Abaı oblysynyń atynan qatysatyn qolónershilerdiń kórmesi ótti. Kórmede óńirdiń sheberleri ózderiniń eń úzdik týyndylaryn usyndy.
Aıta keterlik jaıt, 5-shi Dúnıejúzilik kóshpendiler oıyndary aıasynda úzdik qolóner sheberleriniń ónimderi kórmege qoıylyp, aqyndar aıtysy, salt-dástúrdi nasıhattaıtyn qoıylymdar uıymdastyrylady. Abaı oblysynan osy halyqaralyq deńgeıdegi sharaǵa 6 sport túrinen 12 qatysýshy men 100-den asa mádenıet men óner salasynyń maıtalmandary atsalysady.