Abaı oblysy Kókpekti aýdanynda 22 oqý kabıneti jabdyqtalmaq

<p>SEMEI. KAZINFORM &ndash; Abaı oblysyndaǵy Kókpekti aýdanyndaǵy orta mektepte 22 oqý kabıneti jabdyqtalyp jatyr.</p>

Kókpekti aýdanynda «Aýyldy jerlerde tirek mektepterdiń áleýetin damytý» baǵdarlamasy aıasynda Jaqııa Shaıjúnisov atyndaǵy orta mektepti jaraqtandyrý júrgizilip jatyr. «Qazaqstan halqyna» qory Kókpekti aýdanyndaǵy mektepti qosa alǵanda respýblıkadaǵy tirek mektepterdi jańǵyrtýǵa 250 mln teńge bóldi.

«Bul baǵdarlamanyń maqsaty – aýyl mektepterin damytýdyń tıimdiligin arttyrý, eldegi jetekshi oqý oryndarymen áriptestikti qamtamasyz etý, qala jáne aýyl mektepteri arasyndaǵy bilim berý sapasynyń alshaqtyǵyn azaıtý. Sonymen qatar materıaldyq-tehnıkalyq jaraqtandyrý men pedagogterdiń kásibı damýyna teńdeı jaǵdaı jasaýǵa erekshe nazar aýdarylady. Jaqııa Shaıjúnisov atyndaǵy orta mektepte 22 oqý kabıneti men qosymsha bilim berý sheberhanalary jabdyqtalyp jatyr. Olardyń qatarynda STEM-zerthana, ART-stýdııa, telestýdııa jáne oqýshylarǵa arnalǵan kovorkıng alańymen qamtylǵan zamanaýı kitaphana bar», - dep habarlady Abaı oblysy ákimdiginen.

Mektepti zamanaýı tehnıkalyq quraldarmen jaraqtandyrý jumystaryn 25 maýsymǵa deıin aıaqtaý josparlanyp otyr.