Abaı kúni: AQSh elshiligi aýmaǵynda kıiz úı quryldy

ASTANA. QazAqparat – Amerıka Qurama Shtattarynyń Qazaqstandaǵy elshiligi Abaı kúni qurmetine óz aýlasynda kıiz úı qurdy, dep habarlaıdy QazAqparat.

Bastamany AQSh-tyń Qazaqstandaǵy Tótenshe jáne Ókiletti Elshisi Denıel Rozenblıým kótergen. Kıiz úı qurý vıdeosy elshiliktiń áleýmettik jelidegi paraqshalarynda jarııalandy.

«Elshi Denıel Rozenblıým elshiliktiń aýlasynda qazaq úı qurý rásimine asa qýanyshpen belsene aralasty. «Basqa halyqtyń tili men mádenıetin bilý adamdy sol halyqpen teń etedi» deıdi uly Abaı», - dep jazylǵan elshilik habarlamasynda.

Elshiliktiń habarlaýynsha, kıiz úı kún raıy sýytqansha turady. Keıinirek elshilik ishine aýystyrylady.

Aıta keteıik, búgin Qazaqstanda Abaı kúni atalyp ótedi. Bıyl qazaqtyń uly aqynynyń týǵanyna 178 jyl toldy.

2020 jyly Abaıdyń 175 jyldyǵynda 10 tamyz – Abaı kúni bolyp bekitilgen edi. Qazaqtyń uly aqyny, ulttyq jazba ádebıetiniń jáne ádebı tiliniń negizin salýshy, aǵartýshy Abaı (Ibrahım) Qunanbaıuly 1845 jyly qazirgi Shyǵys Qazaqstan oblysy Abaı aýdanynda dúnıege kelgen.

Abaı óleńderi baı fılosofııalyq, kúreskerlik qasıetke ıe. Ol eń aldymen qazaqtyń telegeı-teńiz aýyz ádebıetinen sýsyndap, batyrlar jyry men ǵashyqtyq jyrlarynyń úrdisine muragerlik etti. «Eskendir», «Masǵut», «Ázim áńgimesi» - Abaıdyń shyǵarmashylyq murasyndaǵy poemalary da zertteýshilerdiń nazarynda. Abaı qazaqtyń óleń úlgisin jańasha turǵydan baıyta tústi. Sondyqtan Abaıdy qazaq jazba ádebıetiniń negizin qalaýshy dep ataýǵa bolady.