Abaı kóptegen urpaqtardyń rýhanılyǵyn qalyptastyrýǵa baǵa jetpes úles qosty – dóńgelek ústel

PAVLODAR. QazAqparat - «Abaı jáne XXI ǵasyrdaǵy Qazaqstan» atty dóńgelek ústel ǵalymdar men jazýshylar, mádenıet jáne óner qyzmetkerleri, jýrnalıster men pedagogtardyń basyn qosty, dep habarlaıdy pavlodarnews.kz.

Uly fılosof ári aqynnyń 175 jyl tolýyna arnalǵan alǵashqy kezdesý «Abaı óz zamandastarynyń ǵana emes, sonymen qatar kóptegen urpaqtardyń rýhanılyǵyn qalyptastyrýǵa baǵa jetpes úles qosty. Bul baılanys búgin de ómir súredi...» - degen sózdermen bastaldy. – Bul – aqynnyń mereıtoıyna arnalǵan qala aıasyndaǵy alǵashqy shara. Abaı shyǵarmashylyǵynyń bilimpazdaryn óskeleń urpaqpen óz bilimderimen bólisýge shaqyramyn, – dep atap ótti qala ákiminiń orynbasary Svetlana Gladysheva. Jınalǵandarǵa Abaıdyń 175 jyldyǵyn merekeleý jónindegi negizgi ımıdjdik is-sharalar jospary usynyldy. Jyl basynda shyǵarmashylyq jáne ǵylymı ıntellıgentsııa ókilderiniń Shyǵys Qazaqstan oblysyndaǵy Jıdebaı shatqalyna sapary josparlanǵan. Delegatsııa Abaıdyń murajaı-úıi men «Abaı-Shákárim» memorıaldyq keshenin tamashalaıdy.

Sondaı-aq, PMPÝ professory Beken Saǵyndyquly, PMÝ professory Aıman Zeınýlına jáne PMÝ professory Serik Elikbaev sóz sóıledi. Sonymen qatar, PMPÝ 1 kýrs stýdenti Krıstına Shevchýk Abaı shyǵarmalaryn qazaq tilinde oryndaý sheberligimen tań qaldyrdy.

Resmı baıandamalardyń sońynda jınalǵandar aldaǵy is-sharalardy talqylap, óz tilekterin bildirdi.