Abaı amanatyn oryndaý baqyty Elbasynyń enshisinde boldy – sarapshy
«QR Tuńǵysh Prezıdenti – Elbasy Nursultan Nazarbaevtyń «Abaı amanaty» atty maqalasyn oqı otyryp, Abaı Qunanbaıulynyń kemeńgerligi men shyǵarmashylyǵyna tereń boılap, sol arqyly Elbasynyń tulǵalyq bolmysyn taǵy bir jańa qyrynan kórýge múmkindik týdy. Abaı Qunanbaıuly qoǵamnyń bir sapadan ekinshi sapaǵa aýysqan aralyq tusynda qazaq halqy úshin dara týǵan tulǵa bolsa, sol Abaıdyń danalyǵymen, halqyna degen asqan janashyrlyǵy jáne súıispenshiligimen sýsyndap, Abaı shyǵarmalaryn ómirlik baǵdary retinde ustanyp kelgen Nursultan Nazarbaev ta Qazaqstannyń syn saǵatta tizginin ustaǵan Kóshbasshysy boldy», - deıdi sarapshy.
Maqalada Elbasy Abaıdy tanýy besikten, anasy men ájesiniń tárbıesinen bastaý alǵanyn, odan keıin el taǵdyryna qatysty árbir mańyzdy, jaýapty sheshimderdiń Uly Abaıdyń qaǵıdalaryn basshylyqqa ala otyryp qabyldanǵandyǵymen bólisti. Eldikti ańsaǵan, birlikti kóksegen danyshpan Abaıdyń amanatyn oryndaý baqyty Elbasynyń enshisinde bolǵanyn da zor maqtanyshpen jetkizgen: «Abaıdyń osy armanynyń oryndalǵanyna, Esildiń jaǵasynda eńseli baıtaq qalanyń irge teýip, boı kóterýine muryndyq bolǵanyma myń da bir shúkirshilik etemin».
«Abaı Qunanbaıulynyń el tarıhyndaǵy baǵa jetpes ornyn, onyń baı murasynyń qoǵam úshin mańyzdylyǵyn, naqyl sózderiniń ǵasyr ótse de ómirsheńdigin tereń túsingen Elbasy, táýelsizdiktiń alǵashqy qıyn jyldaryna qaramastan dana da dara Abaıdyń 150 jyldyq mereıtoıyn halyqaralyq dárejede, ıÝNESKO sheńberinde atap ótýge sheshim qabyldap, nar táýekelge barǵanyn da esimizge salyp ótti. Sol mereıtoılyq is-sharalar barysynda Abaıdy odan ári ulyqtaý, ómirbaıandyq derekterin qaıta jańǵyrtý, ádebı, fılosofııalyq jáne mýzykalyq murasyn paıymdaý, álemdik deńgeıde keńinen tanytý baǵytynda irgeli jumystar atqarylǵandyǵy, aqyn shyǵarmalarynyń eki tomdyq akademııalyq jınaǵy, «Abaı» entsıklopedııasy jaryq kórgeni, Abaıdyń ómiri men shyǵarmashylyǵyn tutas qamtıtyn «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıi qurylǵany maqalada baıandalǵan», - deıdi Á. Nazarbetova.
Bıyl Uly Abaıdyń 175 jyldyǵy adamzat basyna túsken kúrdeli kezeńge qaramastan, tıisti deńgeıde respýblıka aýqymynda, sheteldegi dıplomatııalyq ókildikter aıasynda ótip jatyr.
«Sharalardyń maqsaty – Abaı murasyn zaman suranystaryna saı qaıta zerdeleýdiń mańyzdylyǵynda. Aıta keterligi Abaı Qunanbaıulynyń 175 jyldyǵyna arnalǵan is-sharalar reti Memleket basshysy Qasym-Jomart Toqaevtyń «Egemen Qazaqstan» gazetinde jarııalanǵan «Abaı jáne XXI ǵasyrdaǵy Qazaqstan» atty maqalasynan bastaý alǵan bolatyn», - deıdi Ásel Nazarbetova.