«Abaı» akademııasy nemen aınalysady
«Memleket basshysynyń kelisimine sáıkes, «Abaı» akademııasyn ashý jónindegi naqty tapsyrmaǵa oraı biz daıyndyq jumystaryn aıaqtaýǵa kóshtik. Jalpy, Abaıtaný máselesimen osy ýaqytqa deıinde quzyrly ǵylymı mekemeler aınalysýda. Máselen, M.Áýezov atyndaǵy Ádebıet jáne óner ınstıtýtynyń tutas bir bólimi arnaýly taqyrypta jumys atqaryp jatyr. Endi bizdiń ýnıversıettiń janynda qurylatyn ınstıtýt ta osyndaı ıgilikti iske ózindik úlesin qospaqshy», - dedi Eýrazııa ulttyq ýnıversıtetiniń rektory Erlan Sydyqov.
Onyń aıtýynsha, ınstıtýttyń mıssııasy - Abaı murasyn jan-jaqty tanytý maqsatynda pánaralyq zertteýler júrgizý, Abaıtaný baǵytynda jetekshi ǵylymı ıstıtýt bolý, monografııalar, ǵylymı jınaqtar, oqý ádáistemeliek jáne jańa tehnologııaǵa negizdelgen quraldar ázirleý. Basty maqsaty - Abaı murasy jáne qazaq qoǵamy aıasynda ultyń ádebıeti men tarıhyn, rýhanı-mádenı muralardy, aqyl-oı tujyrymdamalardy otandyq, túrkilik, álemdik sanatta zerdeleıtin ǵylymı áleýetti ortalyq qurý.
«Negizgi mindetteri – abaıtanýǵa qatysty san qyrly aspektilerge zertteýler uıymdastyrý, Abaı tulǵasy men murasyn jańa qyrynan tanytyp, dúnıejúzi keńistigine tanystyrý, Abaı jáne qazaq qoǵamy jobasy aıasynda ult ádebıeti men tarıhy jáne mádenıeti derekterin jınaqtaý júıeleý, saralaý, zerdeleý», - dedi Erlan Sydyqov.
Rektordyń aıtýynsha, «Abaı» akademııasy Qazastannyń sheteldegi Elshilikteri janynan ashylǵan Abaı ortalyqtaryna oqý quraldaryn ázirleý, elektrondyq oqýlyqtar daıarlaý, utqyr qosymshalar jasaý jáne ádistemelik kómekter kórsetý jumystaryn atqarady. Instıtýt aıaǵynan turǵannan keıin halyqaralyq baılanystardy kúshteıtedi. Osy ýaqytqa deıin tarıhta bar Gete ınstıtýty, Lermontov ortalyǵy, Pýshkın ınstıtýty sııaqty álemdik deńgeıdegi ǵylymı mekemelermen baılanys ornatady.
«Instıtýt Abaıdyń 2 tomdyq shyǵarmalaryn tekstologııalyq turǵyda qaıta qarap, tolyqtyryp shyǵarady. Abaıdyń ǵylymı ómirbaıanyn ázirleıdi. «Qunanbaı» tarıhı-ómirbaıandyq zertteýi «Tamasha adamdar ómiri» serııasymen qańtar jaryq kóredi. Akademııa 2020-2022 jyldary aqynnyń ómiri men shyǵarmashylyǵy týraly 16 zertteý men monografııa, 7 oqý jáne oqý quralyn, 7 qoldanbaly tanymdyq qural shyǵarady. Instıtýt jobasynyń úsh jyldyq bıýdjeti 288 mln teńgege baǵalanyp otyr. Onyń ishinde 2020 jylǵa – 120 mln, 2021 jylǵa – 88 mln, 2022 jylǵa – 78 mln teńge. Aıta ketý kerek, ınstıtýttyq bazalyq qarjylandyrýyn EUÝ ózi qamtamasyz etedi. Kitaptardy basyp shyǵarýǵa demeýshiler, metsanattar tartylmaq», - dedi ol.