Abaı – 175 jyl: Kókshetaýda «Abaı-bı, Abaı-zańger» atty konferentsııa ótti

KÓKShETAÝ. QazAqparat - Kókshetaýda Aqmola oblystyq sotynyń bastamasymen Abaı Qunanbaıulynyń 175 jyldyǵyna oraı «Abaı-bı, Abaı-zańger» taqyrybynda respýblıkalyq ǵylymı-tájirıbelik konferentsııasy ótti, dep habarlaıdy QazAqparat tilshisi.

Sharada Abaı Qunanbaıulynyń bı (sot tóreshi), zańgerlik qyzmeti zerttelip, onyń mádenı jáne quqyqtyq rólimen tarıhı orny zerdelendi. Konferentsııaǵa Aqmola oblysynyń ákimi Ermek Marjyqpaev, elimizdiń belgili ǵalymdary, tarıhshy ǵalymdar, Qazaqstan halqy Assambleıasynyń, ÚEU, BAQ, ǵylymı jáne shyǵarmashylyq ıntellıgentsııa ókilderi, ardagerler men Aqmola oblysynyń sýdıalary qatysty.

Quttyqtaý sózinde aımaq basshysy Uly oıshyl, fılosof shyǵarmashylyǵyn nasıhattaý óskeleń urpaqty tárbıeleýde mańyzy zor ekenin atap ótti.

«Kókshetaýda Abaıǵa eskertkish ornatylady, onyń esimi qaladaǵy mektepterdiń birine beriledi. Munyń barlyǵy aqynnyń 175 jyldyǵyn atap ótýde aqmolalyqtardyń qosyp otyrǵan úlesi bolmaqshy», - dedi Ermek Marjyqpaev.

Sonymen qatar, Joǵary sot tóraǵasynyń keńesshisi Nurlan Qalqa QR Joǵary soty tóraǵasynyń quttyqtaý sózin oqyp berdi. Konferentsııa 2 bólimnen turdy. 1-shi bólim – plenarlyq májilis, 2-shi bólim – «Abaı oqýlary». Onda tanymal tarıhshylar, ǵalymdar, zańgerler, fılologtar, zertteýshiler jáne jazýshylardyń 12 ǵylymı baıandamalary tyńdaldy.

Olardyń arasynda «Ardagerler uıymy» respýblıkalyq qoǵamdyq birlestigi tóraǵasynyń orynbasary Ómirzaq Ozǵanbaev óz sózinde qazaq halqynyń tarıhı qos tulǵasy – Abaı men Naýan Haziret arasynda tarıhı-rýhanı baılanys týraly aıtyp berdi.

Shákárim atyndaǵy Semeı memlekettik ýnıversıtetiniń professory Nazgúl Ǵazızova qazirgi zaman men Abaı shyǵarmasyndaǵy adam quqyǵynyń úndestigi týraly baıandama jasady. Sondaı-aq, sharada Abaıdyń áıelder quqyǵy týraly fılosofııalyq kózqarasy men zańgerlik tujyrymdamasy talqylandy.

Konferentsııada Abaıdyń týǵan jeri–Semeıden ákelingen Uly dala aqynynyń shyǵarmashylyq murasy taqyrybynda uıymdastyrylǵan arnaıy kórme usynyldy.

Aıta keteıik, 2019 jylǵy 30 mamyrda Memleket basshysy Qasym-Jomart Toqaev «Abaı Qunanbaıulynyń 175 jyldyq mereıtoıyn merekeleý týraly» Jarlyqqa qol qoıǵan bolatyn. Bıylǵy jyldyń 21 qańtarynda Nur-Sultan qalasynda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev jáne Memleket basshysy Qasym-Jomart Toqaevtyń qatysýymen Abaıdyń 175 jyldyǵyna arnalǵan sharalar bastaý aldy.