Abaı-175: Semeılik dombyrashy balalar respýblıkalyq baıqaýda top jardy

SEMEI. QazAqparat – Semeılik oqýshylar «Uly dalanyń uly Abaıy» atty respýblıkalyq balalar óner baıqaýynda kúı oryndap, birinshi oryndy ıelendi, dep habarlaıdy QazAqparat.

Hakimniń 175 jyldyǵy aıasynda uıymdastyrylǵan saıys Semeı qalalyq mádenıet úıinde ótken.

Baıqaýǵa tyńǵylyqty daıyndyqpen kelgen jergilikti fızıka-matematıka baǵytyndaǵy Nazarbaev Zııatkerlik mektebiniń 7-synyp oqýshylary Ulan Talǵatov pen Darhan Oralhanov «Aspapta oınaý» atalymynda Dáýletkereıdiń «Kóroǵly» kúıin oryndap, jeńiske jetti.

«Dástúrli baıqaý balalardyń jas ereksheligin eskere otyryp 7 janr boıynsha ótkizildi. Ulan men Darhan mektebimizdegi talantty shákirtterdiń qatarynan. Bir atap óterligi – olardyń ekeýi de dombyrada oınaýdy bilmeıtin. Az ǵana ýaqyt ishinde birneshe kúı úırenip, tipti baıqaýlarǵa qatysatyn dárejege jetti. Osynyń barlyǵy - Nazarbaev zııatkerlik mektepterindegi jelilik «100 kúı» jobasynyń jemisi», - deıdi dombyra úıirmesiniń muǵalimi Madııar Ashırov.