Abattandyrý, avtobýs baǵytyn iske qosý: elorda ákimimen kezdesýde turǵyndar qandaı máselelerdi kóterdi

ASTANA. QazAqparat – Búgin elorda ákimi Jeńis Qasymbek qaladaǵy qurylysy uzaqqa sozylǵan birqatar turǵyn úılerdiń úleskerlerimen kezdesti, dep habarlaıdy QazAqparat.

Kezdesý barysynda kóterilgen máseleler týraly búgin qala ákimi óziniń Facebook paraqshasynda jazdy, dep habarlaıdy QazAqarat.

«Qaladaǵy qurylysy uzaqqa sozylǵan nysandardy aralaýdy jalǵastyramyn. Kóppáterli úsh turǵyn úı keshenderiniń úleskerlerimen qaıta kezdestim. Olar - «Korgaljynskıı kvartal», «Komsomolskıı», «Arystan» turǵyn úı keshenderi. Qurylystyń toqtap qalmaýy jáne úleskerlerdiń jumys nátıjesin kórgeni mańyzdy, sol sebepti qurylys alańdarynda turaqty túrde kezdesý ótkizemiz»,-dedi ákim.

Onyń sózinshe, turǵyn úı keshenderiniń jaǵdaıy qıyn bolatyn. Máselen «Arystan» turǵyn úı kesheniniń qurylysy 11 jyl buryn bastalǵan. Nysandy tapsyrar kezde nebári 20-30%-ǵa daıyn edi. Munda 450-ge tarta úlesker otbasy páterin kútip júrdi. Turǵyn úı kesheni birneshe bloktan turady, olardyń bir bóligi aıaqtalyp, úleskerlerge páter kilti tabys etildi. Qalǵan bloktar da aıaqtalady. «Komsomolskıı» turǵyn úı kesheni 8 jyl buryn problemaly dep tanylǵan. Munda 600-den astam úlesker otbasy bar.

«Úleskerler kezdesýlerde ınjenerlik jeliler salý, abattandyrý, qosymsha avtobýs baǵytyn iske qosý sekildi ózge de máselelerdi kóteredi. Biz óz tarapymyzdan merdigerlerge barynsha kómek kórsetemiz. Bizdiń mindetimiz - qurylysy uzaqqa sozylǵan nysandardy aıaqtap, úleskerlerge baspana kiltin tabys etý»,-dedi Jeńis Qasymbek.

Osyǵan deıin elordada eki jyl ishinde 40-tan astam jaıly mektep salynatynyn habarlaǵan bolatynbyz.